काठमाडौँ । विश्वकप–२०२६ को फाइनलमा स्पेनसँग पराजित भएपछि मैदानमा भएको झडपलाई लिएर फिफाको अनुशासन समितिले अर्जेन्टिनी राष्ट्रिय टोली, खेलाडी तथा प्रशिक्षक टोलीका सदस्यहरूमाथि कडा कारबाही गरेको छ।

विश्वकप फाइनलमा स्पेनसँग १–० ले पराजित भएपछि अर्जेन्टिनाका खेलाडी र स्पेनी खेलाडीबीच तनावपूर्ण झडप भएको थियो। खेल सकिएलगत्तै मैदानमा भएको कुटपिट र अनुशासनहीन गतिविधिको छानबिनपछि फिफाले विभिन्न खेलाडी तथा टोलीका अधिकारीमाथि खेल प्रतिबन्ध र आर्थिक जरिवाना लगाएको हो।

पारेडेसलाई १० खेल प्रतिबन्ध

फिफाको कारबाहीअन्तर्गत अर्जेन्टिनाका मिडफिल्डर लिआन्ड्रो पारेडेसलाई १० अन्तर्राष्ट्रिय खेलमा प्रतिबन्ध लगाइएको छ। उनलाई ९० हजार अमेरिकी डलर जरिवाना पनि तोकिएको छ।

फाइनल खेलका क्रममा पारेडेसले स्पेनका खेलाडी एरिक गार्सियाको घाँटी समातेको, गाभीलाई भुइँमा पछारेको तथा उनको अनुहारमा प्रहार गरेको आरोप लागेको थियो।

अर्जेन्टिनाका अर्का खेलाडी नहुएल मोलिनालाई सात खेलको प्रतिबन्ध लगाइएको छ। उनीमाथि पनि ९० हजार अमेरिकी डलर जरिवाना गरिएको छ।

यता, घटनामा संलग्न स्पेनका गाभी र अर्जेन्टिनाका थियागो अल्माडालाई भने एक–एक खेलको प्रतिबन्ध र ३० हजार अमेरिकी डलर जरिवाना तोकिएको छ।

स्पेनका डानी ओल्मोको अनुहारमा प्रहार गरेको आरोपमा अर्जेन्टिनी प्रशिक्षक टोलीका सदस्य रोबर्टो आयालालाई तीन खेलको प्रतिबन्ध लगाइएको छ। उनलाई ३० हजार अमेरिकी डलर जरिवाना पनि गरिएको छ।

फिफाले लगाएको खेल प्रतिबन्ध भने अन्तर्राष्ट्रिय खेलमा मात्र लागू हुने जनाएको छ।

अर्जेन्टिनालाई घरेलु खेलमा पनि सजाय

खेलाडीमाथिको कारबाहीसँगै फिफाले अर्जेन्टिनी फुटबल संघमाथि पनि आर्थिक तथा खेलसम्बन्धी सजाय गरेको छ।

फिफाको आदेशअनुसार अर्जेन्टिनाले आफ्ना आगामी दुई घरेलु अन्तर्राष्ट्रिय खेलमध्ये एक खेलमा ५० प्रतिशत दर्शक क्षमतामा मात्र खेलाउनुपर्नेव्यवस्था गरिएको छ। अर्को खेलसम्बन्धी सजाय भने परीक्षण अवधिको सर्तसहित तत्कालका लागि स्थगन गरिएको बताइएको छ।

अर्जेन्टिनी टोलीको अनुशासनहीन व्यवहार, खेलकुदसँग प्रत्यक्ष सम्बन्ध नभएका विषयमा खेलकुद कार्यक्रमको प्रयोग तथा समर्थकबाट भएको विभेदकारी नाराबाजी र हाउभाउलाई लिएर अर्जेन्टिनी फुटबल संघमाथि ३ लाख २१ हजार अमेरिकी डलर जरिवाना गरिएको छ।

त्यसमध्ये एक लाख अमेरिकी डलर विभेदविरुद्धको अभियान तथा योजनामा खर्च गर्नुपर्ने फिफाको निर्देशन छ। अर्को एक लाख डलर बराबरको जरिवाना भने निश्चित सर्तसहित परीक्षण अवधिका लागि स्थगन गरिएको जनाइएको छ।

फल्कल्यान्ड विवादसमेत कारबाहीको विषय

विश्वकप सेमिफाइनलमा इङ्ल्यान्डलाई २–१ ले पराजित गरेपछि अर्जेन्टिनाका केही खेलाडीले बेलायती अधीनस्थ क्षेत्र फल्कल्यान्ड टापु अर्जेन्टिनाको भएको दाबी गरिएको ब्यानर प्रदर्शन गरेका थिए।

फिफाले खेलकुद प्रतियोगितालाई राजनीतिक वा खेलबाहिरका सन्देशका लागि प्रयोग गरिएको विषयलाई पनि आफ्नो आचारसंहितासँग जोडेर अनुसन्धान गरेको बताइएको छ।

गत महिना न्युयोर्क–न्यु जर्सी स्टेडियममा फाइनल खेल सकिएपछि अर्जेन्टिना र स्पेनका खेलाडी तथा टोलीका सदस्यबीच भएको विवादपछि फिफाले घटनाको विस्तृत छानबिन गर्न अनुशासन तथा आचारसंहितासम्बन्धी अभियोजक नियुक्त गरेको थियो।

अर्जेन्टिनी फुटबल संघ पुनरावेदनमा जाने

अर्जेन्टिनी फुटबल संघले फिफाको कारबाहीविरुद्ध पुनरावेदन गर्ने जनाएको छ। फिफाको निर्णयबाट राहत नपाएमा संघले कोर्ट अफ आर्बिट्रेसन फर स्पोर्ट (सीएएस) सम्म मुद्दा लैजाने तयारी गरेको बताइएको छ।

विश्वकप फाइनलपछि भएको झडप र त्यससँग जोडिएका राजनीतिक तथा विभेदसम्बन्धी गतिविधिमाथि फिफाले गरेको यो कारबाहीलाई अर्जेन्टिनी फुटबलका लागि ठूलो अनुशासनात्मक झट्काका रूपमा हेरिएको छ।

Originally published on abcnews.com.np.