धनगढी । सुदूरपश्चिम प्रदेशमा धानखेतीको मुख्य समयमा रासायनिक मलको माग बढे पनि आपूर्ति पर्याप्त हुन सकेको छैन। धनगढीस्थित कृषि सामग्री कम्पनी लिमिटेडले साउन १ देखि २६ गतेसम्म १ हजार २८७.७ मेट्रिक टन युरिया र २९५.७ मेट्रिक टन डीएपी बिक्री गरेको छ।

सोही अवधिमा कम्पनीले ३३.२५ मेट्रिक टन पोटास बिक्री गरेको जनाएको छ।

कृषि सामग्री कम्पनी लिमिटेडका प्रादेशिक कार्यालय प्रमुख नवलसिंह बोगटीका अनुसार धानखेतीका लागि आवश्यक मल सहकारी तथा कृषि सामग्री बिक्री केन्द्रमार्फत किसानसम्म पुर्‍याउने गरिएको छ। धान रोपाइँको मुख्य समयमा मलको माग बढेकाले आपूर्ति बढाउनुपर्ने अवस्था रहेको उहाँले बताउनुभयो।

डीएपीको आपूर्ति न्यून

धनगढीका लागि कम्पनीको आवश्यक कोटा १ हजार ९१५.८१५ मेट्रिक टन डीएपी रहेको छ। तर साउन २६ गतेसम्म बिक्री भएको र मौज्दातमा रहेको डीएपी जोड्दा जम्मा ३२६.७ मेट्रिक टन मात्र पुगेको छ।

यसअनुसार आवश्यक कोटाको तुलनामा डीएपीको उपलब्धता करिब १७ प्रतिशत मात्र रहेको छ। कम्पनीका अनुसार आवश्यक कोटाको तुलनामा डीएपीमा १ हजार ५८९.११५ मेट्रिक टन कमी छ।

युरियातर्फ भने धनगढीका लागि आवश्यक कोटा १ हजार ९४७.७०५ मेट्रिक टन रहेकोमा बिक्री र मौज्दात जोड्दा १ हजार ३९७.९५५ मेट्रिक टन पुगेको छ। यो आवश्यकताको करिब ७२ प्रतिशत हो।

कम्पनीमा कति मल मौज्दात ?

हाल कम्पनीको गोदाममा ११०.२५० मेट्रिक टन युरिया, ३१ मेट्रिक टन डीएपी र ९३.६५० मेट्रिक टन पोटास मौज्दात रहेको छ।

धानखेतीका लागि मलको माग उच्च रहेका बेला विशेषगरी डीएपीको आपूर्ति कमजोर हुँदा किसानले मल पाउन समस्या भोगिरहेका छन्।

कम्पनीका प्रादेशिक कार्यालय प्रमुख बोगटीले मागअनुसार आपूर्ति बढाउनुपर्ने अवस्था रहेको बताउँदै उपलब्ध मललाई सहकारी तथा बिक्री केन्द्रमार्फत किसानसम्म पुर्‍याउने काम भइरहेको जानकारी दिनुभयो।

Originally published on abcnews.com.np.