काठमाडौँ । राष्ट्रिय सभाको बुधबार बसेको बैठकको शून्य समयमा सांसदहरूले खाना पकाउने एलपी ग्यासको अभाव, शान्ति सुरक्षा, महँगी तथा सरकारको कार्यशैलीलगायत विषयमा सरकारको ध्यानाकर्षण गराएका छन्।

सांसद कमला पन्तले बजारमा एलपी ग्यासको अभाव भइरहँदा पनि सरकारले आपूर्ति सहज रहेको दाबी गर्नु लज्जास्पद भएको बताइन्। जनताको घरघरमा चुलो बल्न छाडेको भन्दै उनले ग्यासको आपूर्ति सहज बनाउन प्रभावकारी नियमन गर्न सरकारसँग माग गरिन्।

नेकपा (एमाले)की सांसद **मदनकुमारी शाह ‘गरिमा’**ले ‘डेलिभरी’को नारा दिने सरकारले जनतालाई ग्यासका लागि घण्टौँ लाइनमा बस्न बाध्य बनाएको भन्दै सरकारको आलोचना गरिन्। सांसद तुलप्रसाद विश्वकर्मा र नरबहादुर विष्टले पनि ग्यास अभावका कारण नागरिकले सास्ती भोगिरहेको भन्दै तत्काल समस्या समाधान गर्न माग गरे।

उनीहरूले माइतीघर मण्डलमा ११६ दिनदेखि धर्नारत दिपा नेपालीको मागप्रति सरकार उदासीन रहेको भन्दै ध्यानाकर्षण गराए।

सुनसरी घटनाको छानबिन माग

सांसद नारायणदत्त मिश्रले सुनसरीको देवानगन्जमा भएको हिंसात्मक घटनाप्रति सरकारको ध्यानाकर्षण गराउँदै निष्पक्ष न्यायिक छानबिन गर्न माग गरे। दुई समूहबीच तनाव बढ्दा सुरक्षा संयन्त्र समयमै परिचालन हुन नसकेको भन्दै उनले दोषीलाई कारबाही गर्न आग्रह गरे।

त्यस्तै, सिराहाको गोलबजारमा भएको आगजनी र भौतिक क्षतिबारे सांसद मोहम्मद खालिदले पीडितलाई उचित क्षतिपूर्ति दिन तथा उनीहरूको सुरक्षाको प्रत्याभूति गर्न सरकारसँग माग गरे।

महँगी र सरकारी कार्ययोजनामाथि प्रश्न

सांसद भूवनबहादुर सुनारले सरकारको सय बुँदे कार्ययोजनाको आलोचना गर्दै सुकुम्वासी बस्तीमा डोजर आतंक, रासायनिक मलको अभाव र महँगी नियन्त्रण गर्न सरकार असफल भएको आरोप लगाए।

सांसद युवराज शर्माले राष्ट्रिय ट्रमा सेन्टरमा रहेका महँगा स्वास्थ्य उपकरण बिग्रिएको, विद्युतमा भ्याट लगाइएको तथा बजारमा कृत्रिम अभाव सिर्जना भएको विषय उठाउँदै यस्ता समस्याले जनतामा निराशा बढाएको बताए।

Originally published on abcnews.com.np.