काठमाडौं । नेकपा एमाले पुनर्जागरण अभियानले पार्टी अध्यक्ष केपी शर्मा ओलीलाई तत्काल निकास दिन माग गर्दै आठबुँदे मागसहित पत्राचार गरेको छ।

अभियानले निर्वाचन समीक्षा तथा पार्टी पुनर्गठन कार्यदलको बैठक तत्काल बोलाउन माग गरेको छ। साथै, कार्यदलले तयार पारेको प्रतिवेदन सचिवालय र केन्द्रीय कमिटीमा छलफल गर्नुपर्ने उसको माग छ।

अभियानले तत्काल सचिवालय बैठक बोलाएर पार्टीको आगामी दिशाबारे आवश्यक निर्णय लिन पनि अध्यक्ष ओलीको ध्यानाकर्षण गराएको छ।

त्यस्तै, पार्टीको शुद्धीकरण, सुदृढीकरण, रूपान्तरण र पुनर्संरचनाको स्पष्ट खाका निर्माण गर्नुपर्ने माग गरिएको छ। नेता तथा कार्यकर्ताको मनोबल उच्च बनाउँदै जनतासँग पार्टीको सम्बन्ध पुनः स्थापित गर्न पनि अभियानले जोड दिएको छ।

कमिटी प्रणाली, सामूहिक निर्णय प्रक्रिया र आन्तरिक लोकतन्त्रलाई प्रभावकारी बनाउनुपर्ने भन्दै अभियानले पार्टीलाई नयाँ ऊर्जा, नयाँ कार्यशैली र नयाँ विश्वाससहित पुनर्गठन गर्न तत्काल पहल गर्न अध्यक्ष ओलीसमक्ष आग्रह गरेको छ।

Originally published on abcnews.com.np.