विराटनगर । नेपाली कांग्रेस कोसी प्रदेश सरकारबाट बाहिरिएको छ। कांग्रेसबाट सरकारमा सहभागी मन्त्रीहरूले मुख्यमन्त्री हिक्मतकुमार कार्कीसमक्ष सामूहिक राजीनामा बुझाएसँगै प्रदेशमा नेकपा (एमाले) र नेपाली कम्युनिस्ट पार्टी (नेकपा) बीच नयाँ सत्ता समीकरणको सम्भावना बढेको छ।

मुख्यमन्त्री कार्कीले बोलाएको मन्त्रिपरिषद् बैठकपछि कांग्रेसका मन्त्रीहरूले सामूहिक राजीनामा दिएका हुन्। मुख्यमन्त्री कार्कीले उनीहरूको राजीनामा स्वीकृत गरेका छन्।

राजीनामा दिनेमा भौतिक पूर्वाधार विकासमन्त्री प्रदीपकुमार सुनुवार, वन तथा वातावरणमन्त्री भीम पराजुली, उद्योग, कृषि तथा सहकारीमन्त्री इस्राइल मन्सुरी, स्वास्थ्यमन्त्री मानबहादुर लिम्बू र भौतिक पूर्वाधार विकास राज्यमन्त्री शोभा चेम्जोङ छन्।

एमाले–कांग्रेस सहमतिबाट बनेको थियो सरकार

२०८१ भदौ २८ गते भएको एमाले र कांग्रेसबीचको सहमतिअनुसार कोसी प्रदेशमा वर्तमान सरकार गठन भएको थियो।

त्यसपछि २०८२ पुस २२ गते मन्त्रिपरिषद् पुनर्गठन हुँदा पनि कांग्रेसबाटै मन्त्रीहरू सहभागी भएका थिए।

तर पछिल्लो समय केन्द्रमा विकसित सत्ता समीकरणको प्रभाव प्रदेशमा समेत परेपछि कांग्रेस सरकारबाट बाहिरिएको हो।

एमाले–नेकपाबीच नयाँ सरकार गठनको तयारी

स्रोतका अनुसार नेकपा (एमाले) र नेपाली कम्युनिस्ट पार्टी (नेकपा)बीच कोसी प्रदेशमा नयाँ सरकार गठन गर्ने विषयमा सहमति भइसकेको छ।

सोही सहमतिअनुसार कांग्रेसले सरकारबाट बाहिरिने निर्णय गरेको बताइएको छ।

एमाले र नेकपाले शुक्रबारसम्म नयाँ मन्त्रिपरिषद् गठन गर्ने तयारी गरिरहेको स्रोतको भनाइ छ।

कांग्रेसका मन्त्रीहरूले राजीनामा दिएसँगै कोसी प्रदेश सरकारको सत्ता समीकरण औपचारिक रूपमा परिवर्तन हुने बाटो खुलेको छ। अब एमाले र नेकपाबीच भएको सहमतिअनुसार नयाँ मन्त्रिपरिषद् गठनको प्रक्रिया अघि बढ्नेछ।

Originally published on abcnews.com.np.