काठमाडौं । नेकपा (मसाल) का महामन्त्री तथा वरिष्ठ साहित्यकार मोहनविक्रम सिंहद्वारा लिखित नाटक ‘१२ मई’ काठमाडौँमा मञ्चन हुने भएको छ।

रक्तिम सांस्कृतिक अभियानका अनुसार आगामी भदौ २१ गते नेपाल प्रज्ञा–प्रतिष्ठानको मुख्य सभाहलमा नाटक मञ्चन गरिनेछ।

नाटकमा तत्कालीन पञ्चायती व्यवस्थाविरुद्ध सञ्चालित लोकतान्त्रिक आन्दोलन, त्यससँग जोडिएको राजनीतिक परिवेश तथा आन्दोलनकारीहरूले गरेको संघर्षलाई कलात्मक रूपमा प्रस्तुत गरिने रक्तिम सांस्कृतिक अभियानका महासचिव हेमराज आश्रमले जानकारी दिए।

आयोजकका अनुसार नाटक मञ्चनको उद्देश्य तत्कालीन आन्दोलनमा सहभागी तथा पक्राउ परेका व्यक्तिहरूको योगदानको सम्मान गर्नुका साथै नयाँ पुस्तालाई नेपालको लोकतान्त्रिक आन्दोलनको एउटा महत्वपूर्ण ऐतिहासिक घटनाबारे जानकारी गराउनु हो।

१२ मईको आन्दोलनको कथा

सिंहले भारतमा रहेका प्रवासी नेपालीहरूले पञ्चायती व्यवस्थाविरुद्ध सञ्चालन गरेको आन्दोलनका क्रममा १२ मई १९८६ (२९ वैशाख २०४३) मा भएको दमनलाई आधार बनाएर नाटक तयार पारेका हुन्।

उक्त आन्दोलनमा पक्राउ परेका ९५ जनालाई नाटक प्रदर्शनका क्रममा सम्मान गरिने आयोजकले जनाएको छ।

सम्मानित हुने व्यक्तिहरूमा राष्ट्रिय सभा सदस्य तुलबहादुर विश्वकर्मा (राजेश विक), चन्द्रबहादुर केसी, किशन अधिकारीलगायत रहेका छन्।

बाढीपीडितलाई सहयोग

नाटक मञ्चनबाट उठेको रकमको ५० प्रतिशत भोटेकोसी बाढीबाट प्रभावित परिवारको सहयोगमा खर्च गरिने नाटककार सिंहले जानकारी दिएका छन्।

यस्तै, सिंहद्वारा लिखित ‘१२ मई’ पुस्तकबाट प्राप्त हुने रोयल्टीसमेत पूर्ण रूपमा बाढीपीडितलाई प्रदान गर्ने उनले बताएका छन्।

ऐतिहासिक राजनीतिक आन्दोलनलाई रंगमञ्चमार्फत नयाँ पुस्तासम्म पुर्‍याउने प्रयाससँगै नाटकबाट प्राप्त रकम विपद् प्रभावितको सहयोगमा उपयोग गर्ने आयोजकको निर्णयले कार्यक्रमलाई सांस्कृतिक प्रस्तुतिसँगै सामाजिक अभियानका रूपमा समेत जोडेको छ।

Originally published on abcnews.com.np.