काठमाडौं । गायिका रचना रिमालले तीजको अवसरमा अस्ट्रेलियाका विभिन्न शहरमा आयोजना हुने आफ्ना सबै सांगीतिक कार्यक्रम रद्द गरेकी छन्।

एनआरएनए वुमन फोरम नारीकुञ्ज अस्ट्रेलियाले रचनाको सहभागितामा विभिन्न शहरमा १० वटा सांगीतिक कार्यक्रम आयोजना गर्ने तयारी गरेको थियो। तर, नेपालमा भोटेकोसीलगायत क्षेत्रमा विनाशकारी बाढी आएपछि रचनाले यसअघि कार्यक्रम स्थगित गरिएको जानकारी दिएकी थिइन्।

बुधबार भने उनले सामाजिक सञ्जालमार्फत सबै कार्यक्रम रद्द गरिएको जानकारी दिएकी हुन्।

राष्ट्र शोकमा रहेका बेला उत्सव मनाउन मनले नमानेकाले कार्यक्रम रद्द गर्ने निर्णय गरेको रचनाले बताएकी छन्।

उनले लेखेकी छन्, ‘नेपालको त्यो अवस्था देखेपछि, राष्ट्रमा शोक परिरहेको समयमा मनले उत्सव मनाउन मानेन। किनकि, यो पीडा कुनै एउटा ठाउँको मात्रै होइन। कुनै जिल्लाको मात्रै होइन। यो सिंगो देशको पीडा हो।’

धेरै तयारी, मेहनत, समय, लगानी र भावना जोडिइसकेको भए पनि अहिले राष्ट्रको दुःखलाई प्राथमिकता दिनुपर्ने महसुस गर्दै कार्यक्रम रद्द गर्ने निर्णय गरिएको उनले उल्लेख गरेकी छन्।

रचनाले अहिले देशलाई उत्सवभन्दा साथ आवश्यक रहेको बताएकी छन्।

‘फेरि भेट्नेछौँ, फेरि गाउनेछौँ, फेरि नाच्नेछौँ तर अहिले होइन। अहिले हाम्रो देशलाई हाम्रो उत्सवभन्दा हाम्रो साथ चाहिएको छ। अहिले हाम्रो गीतभन्दा ठूलो उद्धारको आवाज छ। त्यसैले यसपटक हामीले उत्सव रद्द गरेका छौँ,’ उनले भनेकी छन्।

Originally published on abcnews.com.np.