काठमाडौं । कन्दरा ब्यान्डले कन्सर्टमार्फत भोटेकोसी बाढीपीडितका लागि संकलित २१ लाख रुपैयाँ प्रधानमन्त्री दैवी प्रकोप उद्धार कोषमा हस्तान्तरण गरेको छ । कन्दराको आह्वान र अग्रसरतामा बीएनएमको आयोजना तथा अमेरिकाको एटलान्टामा रहेका नेपाली दर्शक, संघ–संस्था, व्यवसायी, कलाकार, शुभेच्छुक तथा समुदायको सहभागितामा आयोजित कार्यक्रममा उक्त रकम संकलन गरिएको हो ।

एटलान्टास्थित नाफारहित संस्था नेपलिज एसोसिएसन अफ जर्जियाको बैंक खातामार्फत प्रधानमन्त्री राहत कोषमा रकम हस्तान्तरण गरिएको कन्दराले सामाजिक सञ्जालमार्फत जानकारी दिएको छ । कन्दराका गायक तथा संस्थापक विवेक श्रेष्ठले कार्यक्रमलाई केवल सांगीतिक कार्यक्रमका रूपमा नभई मातृभूमिको पीडासँग जोडिएको नेपाली मनहरूको सामूहिक अभिव्यक्तिका रूपमा अर्थ्याएका छन् । उनले देश दुःखिरहेको बेला गीत गाउन सहज नभए पनि संगीतलाई पीडामा मल्हम लगाउने माध्यम बनाउन सकिन्छ भन्ने विश्वासका साथ कार्यक्रम आयोजना गरिएको बताए ।

कन्दरा हाल ७ अगस्टदेखि ३० सेप्टेम्बरसम्म दुई महिना लामो अमेरिका टुरमा रहेको छ । ब्यान्डले आफ्नो अमेरिका टुरको सुरुआत बोस्टन सहरबाट गरेको थियो ।

Originally published on abcnews.com.np.