काठमाडौं । नेपाली कांग्रेसका संसदीय दलका नेता भीष्मराज आङ्देम्बेले जेनजी विद्रोहको जगमा बनेको सरकारले युवाका अपेक्षा पूरा गर्न नसकेको आरोप लगाएका छन्।

अन्तर्राष्ट्रिय युवा दिवसका अवसरमा शुभकामना सन्देश जारी गर्दै आङ्देम्बेले जेनजी आन्दोलनपछि भएको निर्वाचनमा युवासहितका मतदाताले परिवर्तनको चाहना मतमार्फत व्यक्त गरेको उल्लेख गरे। तर, जेनजीले माग गरेको रोजगारी, सुशासन र विदेशिएका युवालाई स्वदेश फर्काउने वातावरण अझै बन्न नसकेको उनको भनाइ छ।

उनले सरकार गठन भएको साढे चार महिना बितिसक्दा पनि विदेशिएका युवालाई स्वदेश फर्काउने ठोस योजना कार्यान्वयन नभएको भन्दै प्रश्न उठाएका छन्। चुनावअघि सरकार गठन भएको १०० दिनभित्र विदेशमा रहेका नेपाली युवालाई स्वदेश फर्काउन पहल गर्ने घोषणा गरिएको स्मरण गराउँदै उनले त्यसको कार्यान्वयन हुन नसकेको बताए।

सरकारका गतिविधिका कारण युवाहरू पुनः निराशातर्फ फर्किन थालेको आङ्देम्बेको दाबी छ। उनले स्वदेशमै स्वरोजगार भएका युवा उमेरका गणेश नेपालीदेखि विवेक मण्डलसम्मले गरेको आत्मदाहको घटनालाई त्यसको गम्भीर उदाहरणका रूपमा प्रस्तुत गरेका छन्।

आङ्देम्बेले युवालाई केवल मतदान गर्ने समूहका रूपमा नभई राष्ट्र निर्माणको नेतृत्व गर्ने शक्तिका रूपमा राज्यले स्वीकार गर्नुपर्ने बताए।

विदेशबाट फर्किएका युवाको ज्ञान, सीप, प्रविधि र पुँजीलाई स्वदेशमै परिचालन गर्न ‘रिटर्नी युवा उद्यमशीलता’ सम्बन्धी ठोस नीति आवश्यक रहेको उनको भनाइ छ।

उनले तीनै तहका सरकारले युवाको सहभागिता, नेतृत्व र सिर्जनशीलतालाई विकासको केन्द्रमा राखेर रोजगारी र उद्यमशीलताको वातावरण निर्माण गर्नुपर्नेमा जोड दिएका छन्।

Originally published on abcnews.com.np.