कास्की । गृह मन्त्रालयले जिल्ला कारागार कास्कीको प्रमुखमा उपसचिव तहका कर्मचारी रहने व्यवस्था गरेको छ। मन्त्रालय तथा अन्तर्गतका कार्यालयको नयाँ संगठन तथा व्यवस्थापन सर्वेक्षण (ओएन्डएम) अनुसार कास्की कारागारको प्रमुखमा उपसचिवको दरबन्दी कायम गरिएको हो।

कास्कीसहित झापा, मोरङ र बाँकेका कारागारमा पनि उपसचिव तहको दरबन्दी थप गरिएको छ।

४२० जना क्षमताको कास्की कारागारमा हाल अधिकृत तहका कर्मचारी प्रमुख छन्। कारागार प्रशासक सम्राट थापामगरका अनुसार अहिले कारागारमा ६६९ पुरुष, ४० महिला र दुई आश्रित गरी ७११ जना रहेका छन्। क्षमताभन्दा निकै बढी कैदीबन्दी रहेको कारागारमा जेनजी आन्दोलनका क्रममा फरार भएका ११५ जना अझै सम्पर्कमा आएका छैनन्।

कारागारमा चार वर्ष र डेढ वर्ष उमेरका दुई बालकसमेत रहेका छन्। त्यहाँ एक स्वास्थ्यकर्मी, १२ कर्मचारी र २८ सुरक्षाकर्मी कार्यरत छन्।

नौ जिल्लामा उपसचिव सिडिओ

गृह मन्त्रालयले पहाडी क्षेत्रका नौ जिल्लामा सहसचिव तहका प्रमुख जिल्ला अधिकारीको दरबन्दी हटाएर उपसचिव तहको दरबन्दी कायम गरेको छ।

अब बैतडी, डडेल्धुरा, अछाम, जुम्ला, सल्यान, जाजरकोट, रोल्पा, भोजपुर र खोटाङमा उपसचिव तहका प्रमुख जिल्ला अधिकारी खटाइनेछन्।

गृह मन्त्रालयका प्रवक्ता आनन्द काफ्लेका अनुसार मन्त्रालयअन्तर्गत नौ सहसचिवको दरबन्दी कटौती गरिएको हो।

पोखरा र भैरहवामा अध्यागमन कार्यालय घटाइयो

पोखरा र भैरहवामा अन्तर्राष्ट्रिय विमानस्थल सञ्चालनमा आएपछि कायम गरिएका दुई–दुई वटा अध्यागमन कार्यालयलाई घटाएर दुवै स्थानमा एक–एक वटा कार्यालय कायम गरिएको छ। नयाँ ओएन्डएम सर्वेक्षणमार्फत मन्त्रालयले कार्यालय तथा कर्मचारीको संरचनामा आवश्यक पुनर्संरचना गरेको हो।

Originally published on abcnews.com.np.