सल्यान । सल्यानको वनगाड कुपिण्डे नगरपालिका–१ अम्रास्थित छिन्चु–जाजरकोट सडकखण्डबाट भेरी नदीमा खसेको बोलेरो जिपसहित बेपत्ता दुई जनाको खोजी बिहीबार बिहानदेखि पुनः सुरु गरिएको छ।

जिल्ला प्रहरी कार्यालय सल्यानका अनुसार बुधबार दिउँसो नदीमा खसेको लु.१ ज ३०२२ नम्बरको बोलेरो जिपमा सवार दुई जना र जिपको अवस्था अझै अज्ञात छ।

बेपत्ता हुनेमा जिपधनी खलबहादुर रानाका छोरा सिद्धकुमाख गाउँपालिका–४ का २३ वर्षीय भीमबहादुर राना र चालक कुमाख गाउँपालिका–५ का ४३ वर्षीय हेमराज बुढाथोकी रहेका छन्।

चारमध्ये दुई जना पौडिएर निस्किए

प्रहरीका अनुसार जिप बुधबार दिउँसो करिब २ बजे बालुवासंग्राहीबाट सल्लीबजारतर्फ जाँदै गर्दा सडकबाट अनियन्त्रित भई भेरी नदीमा खसेको थियो।

जिपमा चार जना सवार थिए। दुर्घटनापछि दुई जना पौडिएर नदीबाट बाहिर निस्कन सफल भएका थिए। उनीहरू वनगाड कुपिण्डे नगरपालिका–१ आपखोलीका २९ वर्षीय प्रेम विक र २१ वर्षीय खुमलाल बुढाथोकी हुन्।

दुर्घटनामा घाइते भएका उनीहरूलाई उपचारका लागि लगिएको थियो। उपचारपछि दुवै जना बुधबार नै डिस्चार्ज भएका प्रहरीले जनाएको छ।

अँध्यारो भएपछि रोकिएको थियो खोजी

भेरी नदीको तीव्र बहाव र गहिराइका कारण बेपत्ताको खोजी चुनौतीपूर्ण बनेको छ। साँझ परेपछि अँध्यारो भएकाले बुधबार साँझ खोजी अभियान स्थगित गरिएको थियो।

बिहीबार बिहान उज्यालो भएपछि डुङ्गा र गोताखोर टोली परिचालन गरी नदीभित्र तथा आसपासका क्षेत्रमा खोजी थालिएको जिल्ला प्रहरी कार्यालय सल्यानका प्रवक्ता तथा प्रहरी निरीक्षक देवराज भट्टराईले जानकारी दिनुभयो।

प्रहरी, गोताखोर तथा स्थानीयको सहयोगमा जिप र बेपत्ता व्यक्तिहरूको खोजी भइरहेको छ। घटना र खोजी अभियानबारे थप विवरण आउन बाँकी रहेको प्रहरीले जनाएको छ।

Originally published on abcnews.com.np.