काठमाडौं । रुसी राष्ट्रपति भ्लादिमिर पुटिनले युरोपेली देशहरूले रुसी कार्गो बोकेका थप व्यावसायिक जहाज जफत गरे युरोपेली जहाज पनि जफत गर्ने चेतावनी दिएका छन्।

प्रशान्त महासागरको सखालिन टापुनजिक रुसी नौसेनाले सैन्य अभ्यास गरिरहेका बेला पुटिनले बुधबार यस्तो चेतावनी दिएका हुन्।

रुसी समाचार एजेन्सी टासका अनुसार पुटिनले रुसले ‘आवश्यक र उपयुक्त लाग्ने स्थानमा’ जहाज जफत गर्न तयार रहेको बताएका छन्। युरोपेली प्रतिबन्ध उल्लंघन गर्दै रुसी तेल ढुवानी गरिरहेको आरोपमा केही युरोपेली देशले रुसी कार्गो बोकेका जहाज रोकेपछि पुटिनको यस्तो प्रतिक्रिया आएको हो।

‘जस्तालाई त्यस्तै जवाफ’

रुसको समाचार एजेन्सी रिया नोभोस्तीले प्रसारण गरेको भनाइमा पुटिनले रुसी जहाज जफत गर्ने योजनालाई ‘समुद्री डकैती र लुटपाट’को संज्ञा दिएका छन्।

उनले भने, “यदि यी योजनालाई व्यवहारमा ल्याइएको छ भने, हामीले जस्तालाई त्यस्तै जवाफ दिनुपर्नेछ।”

पुटिनले रुसी रक्षा मन्त्रालय र प्रशान्त महासागर क्षेत्रमा समुद्री सैन्य गतिविधिका लागि जिम्मेवार प्यासिफिक फ्लिटलाई यस विषयमा आवश्यक निर्देशन दिइसकेको बताए।

गत महिना पारित नयाँ प्रतिबन्धअन्तर्गत युरोपेली संघका सदस्य राष्ट्रलाई जफत गरिएका जहाजमा रहेको तेल वा अन्य कार्गो बिक्री गर्न अनुमति दिइएको छ। पुटिनले युरोपेली देशहरूले रुसी जहाजको आवतजावत सीमित गर्ने र रुसी सम्पत्ति जफत गरी बिक्री गर्ने योजना बनाइरहेको आरोप लगाएका छन्।

नेटोमाथि पनि आरोप

पुटिनले उत्तर एट्लान्टिक सन्धि संगठन (नेटो)ले एसिया–प्रशान्त क्षेत्रमा आफ्नो सैन्य उपस्थिति विस्तार गरिरहेको आरोप लगाए।

उनका अनुसार नयाँ सैन्य–राजनीतिक गठबन्धन निर्माण भइरहेका छन् भने रुसका लागि खतरा उत्पन्न गर्ने नयाँ हतियार प्रणाली तैनाथ गर्ने तयारी भइरहेको छ।

रुसी नौसेनाको पश्चिमी प्रशान्त क्षेत्रमा भएको अभ्यास संयुक्त अमेरिका–दक्षिण कोरियाली सैन्य अभ्यास सुरु हुनुभन्दा करिब एक साताअघि भएको हो। उक्त अभ्यास उत्तर कोरियाबाट हुन सक्ने सम्भावित आक्रमणको सामना गर्ने उद्देश्यले आयोजना गरिएको थियो।

रुस–पश्चिम तनाव बढ्दो

युक्रेन युद्धपछि रुस र पश्चिमी देशबीचको सम्बन्ध तनावपूर्ण रहँदै आएको छ। पछिल्लो समय रुस र चीनबीच सैन्य सहकार्यसमेत बढेको छ। यसले एसिया–प्रशान्त क्षेत्रमा रुस, चीन र पश्चिमी शक्तिबीचको रणनीतिक प्रतिस्पर्धा थप चर्किन सक्ने संकेत गरेको छ।

Originally published on abcnews.com.np.