काठमाडौं । युक्रेनी राष्ट्रपति भोलोदोमिर जेलेन्स्कीले रुसमा ५० हजारसम्म उत्तर कोरियाली सैनिक तैनाथ हुन सक्ने दाबी गरेका छन् ।

यसै महिनामा युक्रेनको सैन्य गुप्तचर निकायका एक अधिकारीले रोयटर्सलाई उत्तर कोरियाली क्षेप्यास्त्र टोलीले पश्चिमी रुसमा जनशक्ति तथा सैन्य उपकरण तैनाथ गर्न थालेको बताएका थिए । उनका अनुसार उक्त टोली युक्रेनमाथिको आक्रमणका लागि १२० वटा ब्यालिस्टिक क्षेप्यास्त्र र ६ वटा लन्चरसहित परिचालन हुन सक्ने अनुमान गरिएको छ ।

जेलेन्स्कीले युक्रेनी भूभागमा उत्तर कोरियाली क्षेप्यास्त्र प्रयोग भएको प्रमाणसमेत रहेको बताएका छन् ।

उत्तर कोरियाले सन् २०२४ मा रुसको कुर्स्क क्षेत्रमा करिब १४ हजार सैनिक पठाएको थियो । तीमध्ये केही सैनिक घाइते वा मारिएको बताइएको छ । उत्तर कोरियाली सैनिकले युक्रेनी सेनाको आक्रमणविरुद्ध रुसलाई सहयोग गरेका थिए ।

युक्रेन तथा विभिन्न स्वतन्त्र निकायका मूल्यांकनअनुसार उत्तर कोरियाले रुसलाई ठूलो परिमाणमा तोप तथा मोर्टारका गोला, ब्यालिस्टिक क्षेप्यास्त्र, लामो दूरीका तोप र मल्टिपल–लन्च रकेट प्रणाली आपूर्ति गरेको छ ।

यद्यपि, केही रुसी सैन्य ब्लगर तथा सैनिकहरूले उत्तर कोरियाबाट प्राप्त केही गोलाको गुणस्तर कमजोर रहेको दाबी गर्दै आएका छन् ।

दक्षिण कोरियासँग सैन्य सहयोगको अनुरोध

यसैबीच, राष्ट्रपति जेलेन्स्कीले युक्रेनको हवाई प्रतिरक्षा क्षमता सुदृढ गर्न दक्षिण कोरियासँग सहयोग मागेका छन् ।

युक्रेनलाई आवश्यक सैन्य क्षेत्रमा दक्षिण कोरियाबाट सहयोग प्राप्त गर्न आफूहरू इच्छुक रहेको जेलेन्स्कीले बताएका छन् ।

युक्रेनमा उच्च क्षमताका हवाई प्रतिरक्षा प्रणालीको ठूलो अभाव रहेको बताइएको छ । यही कमजोरीको फाइदा उठाउँदै रुसले थप ब्यालिस्टिक क्षेप्यास्त्र प्रयोग गर्ने प्रयास गरिरहेको युक्रेनी पक्षको दाबी छ ।

विशेषगरी अमेरिकी ‘प्याट्रियट’ जस्ता उच्च क्षमताका इन्टरसेप्टर प्रणालीबिना ब्यालिस्टिक क्षेप्यास्त्रलाई रोक्न निकै कठिन हुने जनाइएको छ । यस्तो अवस्थामा दक्षिण कोरियासँगको सैन्य तथा प्राविधिक सहयोग युक्रेनका लागि महत्वपूर्ण हुन सक्ने जेलेन्स्कीको अपेक्षा छ ।

Originally published on abcnews.com.np.