काठमाडौँ । सर्वोच्च अदालतले जनआस्था साप्ताहिकका सम्पादक किशोर श्रेष्ठसहित विपक्षीहरूलाई भदौ १ गते अदालतमा उपस्थित हुन आदेश दिएको छ। न्यायाधीश बालकृष्ण ढकालको इजलासले शुक्रबार श्रेष्ठका तर्फबाट दर्ता भएको बन्दीप्रत्यक्षीकरण रिटमाथि सुनुवाइ गर्दै यस्तो आदेश दिएको हो।

अदालतले काठमाडौँ जिल्ला अदालतसहित विपक्षीहरूलाई श्रेष्ठलाई सशरीर उपस्थित गराउनुका साथै अनुसन्धानसम्बन्धी फाइल र बरामद सामग्रीसमेत लिएर आउन आदेश दिएको छ।

अदालतको आदेशमा निवेदकको मागबमोजिम आदेश किन जारी हुन नपर्ने हो भन्ने आधार र कारणसहित भदौ १ गते बिहान १० बजेभित्र महान्यायाधिवक्ताको कार्यालयमार्फत लिखित जवाफ पेस गर्न भनिएको छ।

त्यस्तै, सोही दिन इजलाससमक्ष देखाई फिर्ता लैजाने गरी श्रेष्ठविरुद्ध परेको जाहेरी दरखास्तसहितको अनुसन्धान फाइल पनि पेस गर्न आदेश दिइएको छ।

बरामद विद्युतीय उपकरण पनि ल्याउन आदेश

सर्वोच्चले श्रेष्ठको घर तथा कार्यालयबाट प्रहरीले बरामद गरेका सीपीयू, ल्यापटप, आइप्याड र मोबाइललगायत विद्युतीय उपकरणसमेत अदालतमा उपस्थित गराउन भनेको छ।

वैयक्तिक गोपनीयता हननसम्बन्धी कसुरमा प्रहरीले श्रेष्ठलाई बुधबार राति ललितपुरस्थित उनको घरबाट पक्राउ गरी हिरासतमा राखेको थियो।

पत्नीले दर्ता गराएकी थिइन् बन्दीप्रत्यक्षीकरण रिट

श्रेष्ठलाई गैरकानुनी रूपमा थुनामा राखिएको दाबी गर्दै उनकी पत्नी सरस्वती श्रेष्ठले बिहीबार सर्वोच्च अदालतमा बन्दीप्रत्यक्षीकरण रिट दर्ता गराएकी थिइन्। सोही रिटमाथि सुनुवाइ गर्दै सर्वोच्चले शुक्रबार विपक्षीहरूलाई बन्दी र बरामद सामग्रीसहित उपस्थित हुन आदेश दिएको हो।

सरस्वतीका अनुसार प्रहरीले बिहीबार पनि उनको घरमा दोस्रोपटक खानतलासी गरी सीसी क्यामराको डिभाइस स्टोरेजसमेत लिएर गएको छ।

यसअघि श्रेष्ठलाई पक्राउ गरेकै दिन प्रहरीले उनको घर तथा जनआस्था साप्ताहिकको कार्यालयमा खानतलासी गरी कम्प्युटरलगायत महत्वपूर्ण विद्युतीय उपकरण नियन्त्रणमा लिएको थियो।

अब भदौ १ गते हुने सुनुवाइमा श्रेष्ठको पक्राउको कानुनी आधार, अनुसन्धानको अवस्था तथा प्रहरीले बरामद गरेका सामग्रीका विषयमा सर्वोच्च अदालतले थप निर्णय गर्नेछ।

Originally published on abcnews.com.np.