काठमाडौं । लगातारको वर्षाका कारण देशका विभिन्न जिल्लामा बाढी, पहिरो र सडक कटान हुँदा राजमार्ग तथा सडकखण्डहरू अवरुद्ध भएका छन्। सडक अवरुद्ध हुँदा सवारीसाधनको आवागमन प्रभावित भई यात्रु समस्यामा परेका छन्।

प्रहरी प्रधान कार्यालयका अनुसार काभ्रेपलाञ्चोक–सिन्धुली जोड्ने बीपी राजमार्गको खुर्कोट–नेपालथोक–कटुन्जेबेँसी सडकखण्डमा बाढीको जोखिम बढेपछि दैनिक साँझ ६ बजेदेखि बिहान ४ बजेसम्म सवारीसाधन सञ्चालनमा रोक लगाइएको छ। सो सडकखण्डमा बिहान ४ बजेदेखि बेलुका ६ बजेसम्म भने यातायात सञ्चालन हुनेछ।

त्यस्तै, मकवानपुरको कान्ति लोकपथमा पनि वर्षाका कारण साँझ ५ बजेदेखि बिहान ५ बजेसम्म सबै प्रकारका सवारीसाधन सञ्चालनमा रोक लगाइएको प्रहरीले जनाएको छ।

विभिन्न राजमार्ग अवरुद्ध

इलाम नगरपालिका–९ राजदुवालीमा हिलोका कारण मेची राजमार्ग पूर्ण रूपमा अवरुद्ध भएको छ। सो स्थानमा वैकल्पिक मार्ग भने उपलब्ध रहेको प्रहरीले जनाएको छ।

सिन्धुपाल्चोकको अरनिको राजमार्गअन्तर्गत भोटेकोशी गाउँपालिका–४ चारकिलो, लिपिङ क्षेत्रमा सडक भासिँदा सडक पूर्ण रूपमा बन्द भएको छ।

रसुवाको उत्तरगया गाउँपालिका–५ खाल्टेमा सडक कटान हुँदा त्रिशूली–मैलुङ–स्याफ्रुबेँसी सडकखण्ड पनि पूर्ण रूपमा अवरुद्ध भएको छ।

रुकुम पश्चिमको आठबिसकोट नगरपालिका–६ रिजेगार्ड खोला नजिक पहिरो खस्दा भेरी करिडोरअन्तर्गत जाजरकोट–डोल्पा सडक पूर्ण रूपमा बन्द भएको प्रहरीले जनाएको छ।

मध्यपहाडी लोकमार्गमा पनि पहिरो

रुकुम पूर्वको भूमे गाउँपालिका–४ काडाबगर र धौलापहिरामा पहिरो खसेपछि मध्यपहाडी लोकमार्ग समेत पूर्ण रूपमा अवरुद्ध भएको छ।

त्यस्तै, रोल्पाको थबाङ गाउँपालिका–२ लाप्लेभिर र दबाङमा भूस्खलन हुँदा घोराही–थबाङ सहिद मार्ग दुई स्थानमा पूर्ण रूपमा बन्द भएको छ।

सडक खुलाउने प्रयास

अवरुद्ध सडकहरू खुलाउन सम्बन्धित स्थानीय तह, सडक कार्यालय तथा प्रहरीले आवश्यक पहल गरिरहेको जनाइएको छ। वर्षा अझै जारी रहेकाले अन्य सडकखण्डमा समेत बाढी, पहिरो र सडक कटानका कारण थप अवरोध आउन सक्ने प्रहरीले जनाएको छ।

प्रहरीले सडकको अवस्था बुझेर मात्रै यात्रा गर्न र जोखिमयुक्त क्षेत्रमा सावधानी अपनाउन आग्रह गरेको छ।

Originally published on abcnews.com.np.