काठमाडौं । भारतीय राज्य पश्चिम बंगालका पूर्वमन्त्री तथा विधानसभाका पूर्वउपाध्यक्ष आशिष बनर्जी आइतबार बिहान पार्टी कार्यालयमै मृत भेटिएका छन्।

तृणमूल कांग्रेसका नेता बनर्जी पूर्वमुख्यमन्त्री ममता बनर्जीनिकट मानिन्थे। बीबीसी हिन्दीका अनुसार उनको निवासनजिकै रहेको पार्टी कार्यालयको कोठामा शव फेला परेको हो।

पश्चिम बंगालको वीरभूम जिल्लाको रामपुरहाट निर्वाचन क्षेत्रबाट पाँच पटक विधायक बनेका बनर्जीको मृत्युको कारणबारे प्रहरीले अनुसन्धान गरिरहेको छ। एक वरिष्ठ प्रहरी अधिकारीका अनुसार उनको शव कोठाभित्र फेला परेको थियो।

प्रहरी स्रोतले शव नजिकै सुसाइड नोटसमेत फेला परेको जनाएको छ। यद्यपि प्रहरीले नोटमा के लेखिएको थियो भन्नेबारे थप विवरण सार्वजनिक गरेको छैन। शव पोस्टमार्टमका लागि अस्पताल पठाइएको छ।

बनर्जीले सन् २००१ देखि रामपुरहाट निर्वाचन क्षेत्रबाट लगातार चुनाव जित्दै आएका थिए। तर यस वर्ष भएको निर्वाचनमा उनी भारतीय जनता पार्टी (भाजपा)का उम्मेदवार ध्रुव साहासँग पराजित भएका थिए।

ममता बनर्जी नेतृत्वको सरकारमा उनले स्कुल शिक्षा र कृषि मन्त्रीका रूपमा जिम्मेवारी सम्हालेका थिए। सन् २०२१ मा उनी पश्चिम बंगाल विधानसभाको उपाध्यक्षसमेत बनेका थिए।

बर्दवान विश्वविद्यालयबाट बंगाली विषयमा विद्यावारिधि गरेका बनर्जीले रामपुरहाट कलेजमा शिक्षकका रूपमा करियर सुरु गरेका थिए। पछि राजनीतिमा प्रवेश गरेका उनी तृणमूल कांग्रेसमा ममता बनर्जीका विश्वासपात्र नेताका रूपमा चिनिन्थे।

Originally published on abcnews.com.np.