काठमाडौं । भदौ ५ गतेदेखि प्रदर्शनमा आउन लागेको चलचित्र ‘मास्टर्नी’ले दर्शकका लागि आकर्षक योजना सार्वजनिक गरेको छ । निर्माण टिमले खल्ती एपमार्फत टिकट खरिद गर्ने एक भाग्यशाली दर्शकलाई बीगाउस इलेक्ट्रिक स्कुटर प्रदान गर्ने घोषणा गरेको हो ।

भदौ ३ देखि ९ गतेसम्म खल्ती एपमार्फत टिकट खरिद गर्ने दर्शकमध्ये एक जनालाई स्कुटर प्रदान गरिनेछ । निर्माण टिमले ‘टिकट किन्नुहोस्, फिल्म हेर्नुहोस् अनि स्कुटर जित्ने अवसर नछुटाउनुहोस्!’ भन्ने नारासहित योजना ल्याएको हो ।

चलचित्रको ट्रेलर, टिजर तथा ‘गुराँस फुल्दा’ गीत सार्वजनिक भएसँगै दर्शकबाट सकारात्मक प्रतिक्रिया प्राप्त भइरहेको निर्माण पक्षले जनाएको छ ।

केन्द्रीय चलचित्र जाँच समिति (सेन्सर बोर्ड)ले ‘मास्टर्नी’लाई एडल्ट सर्टिफिकेट दिएको छ । त्यसअनुसार १६ वर्षभन्दा माथिका दर्शकले मात्र चलचित्र हेर्न पाउनेछन् ।

आयंका फिल्म्सको प्रस्तुतिमा बनेको चलचित्र क्राइम थ्रिलर तथा फ्यामिली ड्रामा विधामा आधारित छ । चलचित्रमा प्रियंका कार्की जोशी, सिम्रन खड्का, दीपकराज गिरी, दीपाश्री निरौला, सन्दीप क्षेत्री, प्रमोद अग्रहरी, ऋचा शर्मा, आर्यन सिग्देल, दिनेश काफ्ले र रक्षा थापालगायत कलाकारको अभिनय छ ।

सुवेन्दु घोषले निर्देशन गरेको चलचित्र प्रियंका कार्की जोशी, आयुष्मान जोशी, क्याबिनेट श्रेष्ठ र प्रनित कार्कीले संयुक्त रूपमा निर्माण गरेका हुन् । सुरक्षा सिंह मल्होत्रा र सिमोस सुनुवार कार्यकारी निर्माता छन् ।

कथा, पटकथा र संगीत

चलचित्रको कथा प्रियंका कार्कीले लेखेकी हुन् भने पटकथा शान बस्नेतले तयार पारेका छन् । कथा र पटकथाकारको सहकार्य संवाद लेखनमा समेत रहेको छ ।

युवराज इन्दोरियाले छायाङ्कन गरेको चलचित्रलाई राजा सिंह सिदुले सम्पादन गरेका छन् । रोहित शाक्यको संगीत र त्रिशाला गुरुङको स्वरमा तयार गीत चलचित्रमा समावेश गरिएको छ ।

Originally published on abcnews.com.np.