काठमाडौं । प्रस्तावित शिक्षा ऐनका विषयमा शिक्षा तथा खेलकुद मन्त्रालयले प्रदेशगत रूपमा सुरु गरेको ‘शिक्षा संवाद’ कार्यक्रममा आफूलाई सहभागी नगराइएको भन्दै नेपाल शिक्षक महासंघले आपत्ति जनाएको छ।

महासंघले आइतबार विज्ञप्ति जारी गर्दै शिक्षक–कर्मचारीका पेसागत विषयमा नीति संवाद भइरहेका बेला शिक्षा ऐनले व्यवस्था गरेको आधिकारिक पेसागत संस्था नेपाल शिक्षक महासंघको संस्थागत उपस्थिति नखोजिनु र नराखिनु गम्भीर विषय भएको जनाएको छ।

महासंघले यस्तो कदमले शिक्षक–कर्मचारीका समस्या तथा पेसागत आन्दोलनप्रति मन्त्रालयको बेवास्ता प्रस्ट भएको आरोप लगाएको छ। विज्ञप्तिमा मन्त्रालयलाई आफ्नो निर्णय सच्याउन आग्रह गर्दै अन्यथा उत्पन्न हुने परिस्थितिको जिम्मेवारी मन्त्रालयले नै लिनुपर्ने चेतावनी दिइएको छ।

शिक्षा ऐन निर्माणअघि देशभरका शिक्षा सरोकारवालाको सुझाव लिन मन्त्रालयले प्रदेशगत रूपमा ‘शिक्षा संवाद’ कार्यक्रम सुरु गरेको हो। अभियानअन्तर्गत शनिबार कोसी प्रदेशको विराटनगरमा पहिलो कार्यक्रम आयोजना गरिएको थियो।

विराटनगरस्थित आदर्श माध्यमिक विद्यालयमा आयोजित कार्यक्रममा स्थानीय विद्यालयका प्रधानाध्यापक, शिक्षक, विद्यार्थी, अभिभावकलगायत शिक्षा क्षेत्रका सरोकारवालाको सहभागिता थियो।

‘शिक्षा संवाद’को दोस्रो कार्यक्रम आइतबार मधेस प्रदेशको जनकपुरमा आयोजना हुँदैछ। महासंघले भने आफूलाई संस्थागत रूपमा सहभागी नगराइएको विषयमा मन्त्रालयको ध्यानाकर्षण गराउँदै तत्काल सच्याउन माग गरेको छ।

Originally published on abcnews.com.np.