काठमाडौं । चर्चित गायिका रचना रिमालको सांगीतिक यात्रा विद्यालयको पाठ्यक्रममा समेटिएको छ ।

झापाको भद्रपुर नगरपालिकाले तयार पारेको स्थानीय पाठ्यक्रमअन्तर्गत कक्षा ४ को ‘भद्रपुर सेरोफेरो’ पुस्तकमा रिमालको जीवनी तथा सांगीतिक सफलतालाई पाठ्यसामग्रीका रूपमा समावेश गरिएको हो ।

पुस्तकको ‘पाठ २ : रचना रिमाल’ शीर्षकमा शिक्षक र विद्यार्थीबीचको संवादमार्फत उनको जीवन, सांगीतिक यात्रा र सफलताको कथा प्रस्तुत गरिएको छ । पाठमा उनको जन्मदेखि सांगीतिक क्षेत्रमा हासिल गरेका उपलब्धिसम्मका विषयलाई विद्यार्थीले बुझ्ने गरी सरल भाषामा समेटिएको छ ।

आफ्नो सांगीतिक यात्रा पाठ्यक्रममा समेटिएपछि रिमालले खुसी व्यक्त गरेकी छन् । उनले यसलाई आफू हुर्किएको स्थानले दिएको अमूल्य सम्मानका रूपमा लिएकी छन् ।

“आफ्नै माटोको यो सम्मान मेरो लागि अमूल्य छ । जुन ठाउँमा म हुर्किएँ, जुन माटोमा मैले सपना देखेँ, जसले मेरा सपनाहरूलाई आकार दियो, आज त्यही भद्रपुरमा मेरो सांगीतिक यात्राको एउटा अध्याय बनेर नयाँ पुस्ताले पढ्ने कक्षा ४ को पाठ्यक्रममा समेटिएको देख्दा मन असाध्यै भावुक भएको छ,” उनले भनेकी छन् ।

रिमालले आफ्नो जन्मभूमि भद्रपुरले दिएको यो सम्मानले आफूलाई थप उत्साहित बनाएको बताएकी छन् ।

Originally published on abcnews.com.np.