वाशिंगटन डिसी । अमेरिकी राष्ट्रपति डोनाल्ड ट्रम्पले दक्षिण कोरियासँग हुने वार्षिक संयुक्त सैन्य अभ्यासमा भारी कटौती गर्न पेन्टागनलाई निर्देशन दिएका छन्। दक्षिण कोरियाले इरानविरुद्धको अमेरिकी युद्धमा सहयोग गर्न अस्वीकार गरेको तथा उत्तर कोरियाली नेता किम जोङ–उनसँग आफ्नो सम्बन्ध राम्रो रहेको दाबी गर्दै ट्रम्पले यस्तो निर्देशन दिएका हुन्।

ट्रम्पले सामाजिक सञ्जाल ‘ट्रुथ सोसल’मार्फत संयुक्त सैन्य अभ्यास महँगो हुनुका साथै उत्तर कोरियाका लागि अनुपयुक्त र शत्रुतापूर्ण सन्देश भएको बताएका छन्। अभ्यास रद्द गर्न ढिला भइसकेकाले रक्षामन्त्री पिट हेगसेथलाई अभ्यासको आकारमा भारी कटौती गर्न निर्देशन दिएको उनले उल्लेख गरेका छन्।

ट्रम्पका अनुसार उनले दक्षिण कोरियाका राष्ट्रपतिसँग इरानको आणविक निःशस्त्रीकरण प्रयासमा अमेरिकालाई सहयोग गर्नेबारे छलफल गरेका थिए। तर दक्षिण कोरियाले त्यसमा असहमति जनाएको उनको भनाइ छ। यसलाई दक्षिण कोरियासँगको अमेरिकी सुरक्षा गठबन्धनप्रतिको ट्रम्प प्रशासनको दृष्टिकोणमा आएको परिवर्तनका रूपमा हेरिएको छ।

१८ हजार दक्षिण कोरियाली सैनिक सहभागी

दक्षिण कोरिया र अमेरिकाबीचको ११ दिने ‘उल्ची फ्रिडम सिल्ड’ संयुक्त सैन्य अभ्यासमा करिब १८ हजार दक्षिण कोरियाली सैनिक सहभागी छन्। उत्तर कोरियाबाट हुन सक्ने सैन्य खतराविरुद्ध संयुक्त प्रतिरक्षा क्षमता सुदृढ गर्ने उद्देश्यले अभ्यास आयोजना गरिएको हो।

अभ्यासमा वास्तविक गोलीबारी, सैन्य युक्ति तथा नदी पार गर्ने अभ्यासलगायत गतिविधि समावेश छन्। अमेरिकी सेनाका अनुसार यसले अमेरिका–दक्षिण कोरिया गठबन्धनलाई थप मजबुत बनाउँदै क्षेत्रीय शान्ति तथा सुरक्षामा योगदान पुर्‍याउँछ।

अभ्यास उत्तर कोरियाले ब्यालिस्टिक क्षेप्यास्त्र परीक्षण पुनः सुरु गरेको केही दिनपछि भएको हो।

ट्रम्पको निर्णयको आलोचना

अमेरिकी डेमोक्र्याटिक सिनेटर तथा पूर्वनौसेना पाइलट मार्क केलीले संयुक्त सैन्य अभ्यास कमजोर पार्ने निर्णयको आलोचना गरेका छन्। उनले यसलाई अदूरदर्शी र गल्तीपूर्ण कदम भनेका छन्।

उत्तर कोरियाले पनि अमेरिका र दक्षिण कोरियाको संयुक्त सैन्य अभ्यासलाई ‘आक्रामक युद्धको पूर्वाभ्यास’ भन्दै क्षेत्रीय अस्थिरता बढाउने चेतावनी दिएको छ। उत्तर कोरियाले विगतमा यस्ता सैन्य अभ्यासलाई आफ्नो आणविक तथा क्षेप्यास्त्र कार्यक्रम विस्तार गर्ने कारणका रूपमा प्रस्तुत गर्दै आएको छ।

किमसँग सम्बन्ध सुधार्ने संकेत

सन् २०१९ मा ट्रम्प र किम जोङ–उनबीचको आणविक कूटनीति असफल भएपछि उत्तर कोरियाले आफ्नो आणविक तथा क्षेप्यास्त्र क्षमता विस्तारलाई तीव्रता दिएको छ। ट्रम्पले आफ्नो पहिलो कार्यकालमा किमसँग तीन पटक भेट गरेका थिए र दोस्रो कार्यकालमा पनि उनीसँग वार्ता पुनः सुरु गर्ने इच्छा व्यक्त गर्दै आएका छन्।

ट्रम्पले आफ्नो पहिलो कार्यकालमा पनि अमेरिका–दक्षिण कोरिया संयुक्त सैन्य अभ्यासलाई महँगो र उत्तेजक भन्दै आलोचना गरेका थिए। सन् २०१८ मा किमसँग सिंगापुरमा भेट गरेपछि उनले यस्ता अभ्यास रोक्दा ठूलो रकम बचत हुने बताएका थिए।

Originally published on abcnews.com.np.