काठमाडौं । अमेरिकी राष्ट्रपति डोनाल्ड ट्रम्पले दक्षिण कोरियासँग हुँदै आएको संयुक्त सैन्य अभ्यास उल्लेख्य रूपमा घटाउने घोषणा गरेका छन् ।

ट्रम्पले सामाजिक सञ्जाल ‘ट्रुथ सोसल’मार्फत यस्तो घोषणा गर्दै दक्षिण कोरियाले हालै इरानको निःशस्त्रीकरण अभियानमा अमेरिकालाई साथ दिन अस्वीकार गरेको आरोप लगाएका छन् । उनले उत्तर कोरियाली नेता किम जोङ उनसँग आफ्नो ‘अत्यन्तै राम्रो सम्बन्ध’ रहेको उल्लेख गर्दै संयुक्त सैन्य अभ्यास घटाउने बताएका हुन् ।

संयुक्त सैन्य अभ्यास निकै महँगो हुने र त्यसको अधिकांश खर्च अमेरिकाले व्यहोर्दै आएको ट्रम्पको दाबी छ । यस्ता अभ्यासले शत्रुतापूर्ण सन्देश दिने गरेको उनको भनाइ छ ।

यद्यपि, अमेरिका र दक्षिण कोरियाले सोमबारदेखि वार्षिक संयुक्त सैन्य अभ्यास सुरु गर्ने तयारी गरिसकेका छन् । ट्रम्पले अहिले आएर अभ्यास रद्द गर्न ढिलो भइसकेको बताएका छन् ।

दक्षिण कोरियाले भने अमेरिकासँगको संयुक्त सैन्य अभ्यास पूर्वनिर्धारित तालिकाअनुसार नै सञ्चालन हुने जनाएको छ । ११ दिनसम्म चल्ने अभ्यास अघिल्ला वर्षहरूकै जस्तै ठूलो स्तरमा हुने र करिब १८ हजार दक्षिण कोरियाली सैनिक सहभागी हुने बताइएको छ ।

गत साता अमेरिकी र दक्षिण कोरियाली सैन्य अधिकारीहरूले संयुक्त पत्रकार सम्मेलनमार्फत अभ्यासको घोषणा गरेका थिए ।

ट्रम्पले दक्षिण कोरियासँगको संयुक्त सैन्य अभ्यास घटाउने घोषणा गरेको यो पहिलोपटक भने होइन । सन् २०१८ मा उत्तर कोरियाली नेता किम जोङ उनसँग परमाणु निःशस्त्रीकरणसम्बन्धी वार्ता चलिरहेका बेला उनले यस्ता अभ्यास स्थगित गरेका थिए । त्यसपछि सन् २०२० मा कोभिड–१९ महामारीका कारण पनि अभ्यासको आकार घटाइएको थियो ।

यसपटक पनि ट्रम्पले अभ्यास घटाउने निर्णयलाई किमसँगको आफ्नो सम्बन्धसँग जोडेर प्रस्तुत गरेका छन् । उनको घोषणाले अमेरिका–दक्षिण कोरिया सैन्य सहकार्यलाई उत्तर कोरियासँगको कूटनीतिक सम्बन्धको सन्दर्भमा पुनःसमायोजन गर्न खोजिएको संकेत गरेको छ ।

ट्रम्पको घोषणाभन्दा केही दिनअघि दक्षिण कोरियाका राष्ट्रपति ली जे–म्युङले पनि उत्तर कोरियासँग वार्ताको प्रस्ताव राखेका थिए ।

Originally published on abcnews.com.np.