काठमाडौं । बेलायतको दक्षिण वेल्समा फैलिएको डढेलो नियन्त्रणका लागि गोर्खा सैनिकलाई परिचालन गरिएको छ। डढेलो नियन्त्रणमा गोर्खा सैनिकले गरेको योगदानको बेलायतमा प्रशंसा गरिएको छ।

वेल्स फायर एन्ड रेस्क्यु सर्भिस दबाबमा रहेका बेला सेनाको सहयोग महत्वपूर्ण भएको मुख्य अग्नि नियन्त्रण अधिकृत फिन मोनाहानले बताएका छन्। उनले गोर्खा सैनिकको कामलाई ‘अभूतपूर्व’ भन्दै प्रशंसा गरेका छन्।

डढेलो नियन्त्रणका लागि ‘क्विन्स ओन गोर्खा लजिस्टिक रेजिमेन्ट’का करिब २०० जना गोर्खा सैनिकसहित २२ रोयल इन्जिनियर्स, रोयल लजिस्टिक्स कर्प्स तथा सेनाका हेलिकोप्टर परिचालन गरिएको थियो।

आगो नियन्त्रणमा गोर्खाको भूमिका

गोर्खा सैनिकहरूले अग्नि नियन्त्रक तथा उद्धारकर्मीलाई आवश्यक पानी र बन्दोबस्ती सामग्री उपलब्ध गराउन सहयोग गरेका थिए। उनीहरूले खाडल खन्ने तथा आगो फैलिन नदिन ‘फायर ब्रेक’ अर्थात् आगो रोक्ने रेखा निर्माणमा समेत महत्वपूर्ण भूमिका खेलेका थिए।

मुख्य अग्नि नियन्त्रण अधिकृत मोनाहानका अनुसार अग्नि नियन्त्रकसँग रहेका विशेष सीपलाई प्रभावकारी रूपमा प्रयोग गर्न गोर्खा सैनिकको सहयोग महत्वपूर्ण बनेको थियो।

१४ स्थानमा आगलागी

दक्षिण वेल्समा आइतबार मात्रै करिब १४ वटा छुट्टाछुट्टै स्थानमा आगलागीका घटना भएका थिए। ती स्थानमा फैलिएको आगो नियन्त्रणका लागि अग्नि नियन्त्रक र बेलायती सेनाले संयुक्त रूपमा काम गरेका थिए।

बेलायतको संकट व्यवस्थापनमा गोर्खा सैनिकको भूमिकालाई स्थानीय अधिकारीहरूले उच्च प्रशंसा गरेका छन्। समाचार स्रोतका अनुसार, डढेलो नियन्त्रणमा उनीहरूको भौतिक श्रम, बन्दोबस्ती सहयोग र आगो रोक्ने संरचना निर्माण विशेष रूपमा प्रभावकारी बनेको थियो।

Originally published on abcnews.com.np.