काठमाडौं । दक्षिणी लेबनानमा शनिबार भएका इजरायली हवाई आक्रमणमा कम्तीमा ११ जनाको मृत्यु भएको छ भने १९ जना घाइते भएका छन् । लेबनानको स्वास्थ्य मन्त्रालयका अनुसार मृतकमध्ये महिला तथा बालबालिका पनि छन् ।

नाबातियेह जिल्लाको अन्सार गाउँको बाहिरी क्षेत्रमा भएको आक्रमणमा एउटा घर ध्वस्त हुँदा सात जनाको मृत्यु भएको थियो । त्यसपछि देइर अल–जहरानी गाउँमा भएको अर्को आक्रमणमा चार जनाको मृत्यु भएको र १७ जना घाइते भएका छन् ।

नाबातियेह नजिकैको रणनीतिक अली अल–ताहेर पहाडी क्षेत्रमा पनि इजरायली सेनाले आक्रमण गरेको थियो ।

इजरायली सेनाले हिजबुल्लाहको सैन्य पूर्वाधारलाई लक्षित गरी आक्रमण गरिएको दाबी गरेको छ । उसका अनुसार हिजबुल्लाहसँग सम्बन्धित गतिविधिको जवाफमा आक्रमण गरिएको हो ।

बढ्दो तनाव

शनिबारको आक्रमण जुन महिनामा भएको युद्धविरामपछि दक्षिणी लेबनानमा भएको सबैभन्दा घातक आक्रमण बनेको अन्तर्राष्ट्रिय सञ्चारमाध्यमले जनाएका छन् । यस घटनाले इजरायल र हिजबुल्लाहबीचको तनाव पुनः बढ्ने चिन्ता बढाएको छ ।

लेबनानका प्रधानमन्त्री नवाफ सलामले आक्रमणको निन्दा गर्दै यसले क्षेत्रीय स्थायित्वमा असर पार्ने बताएका छन् । हिजबुल्लाहले पनि आक्रमणको विरोध गर्दै जवाफ दिने चेतावनी दिएको छ ।

Originally published on abcnews.com.np.