काठमाडौं । फ्रेन्च क्लब पेरिस सेन्ट जर्मेन (पीएसजी) ले स्पेनिस फरवार्ड फेरान टोरेसलाई बार्सिलोनाबाट अनुबन्ध गरेको छ ।

पीएसजीले २६ वर्षीय टोरेसका लागि बार्सिलोनालाई ५० मिलियन युरो तिरेको हो । टोरेसले पीएसजीसँग सन् २०३१ जुन अन्त्यसम्मको सम्झौता गरेका छन् ।

टोरेस यस सिजन पीएसजी भित्रिने दोस्रो फरवार्ड बनेका छन् । यसअघि क्लबले मोनाकोबाट माघ्नेस अक्लिउसलाई अनुबन्ध गरेको थियो ।

गत महिना सम्पन्न फिफा विश्वकपको फाइनलमा अर्जेन्टिनाविरुद्ध अतिरिक्त समयमा निर्णायक गोल गर्दै टोरेसले स्पेनलाई दोस्रोपटक विश्व च्याम्पियन बनाउन महत्वपूर्ण भूमिका खेलेका थिए ।

बार्सिलोनामा गत सिजन पनि टोरेसको प्रदर्शन प्रभावशाली थियो । उनले सबै प्रतियोगितामा ४९ खेल खेल्दै २१ गोल र तीन असिस्ट गरेका थिए । उनको प्रदर्शनमा बार्सिलोनाले स्पेनिस ला लिगाको उपाधि जितेको थियो ।

टोरेस सन् २०२२ मा इंग्लिस क्लब म्यानचेस्टर सिटीबाट बार्सिलोना पुगेका थिए ।

Originally published on abcnews.com.np.