भक्तपुर । व्यवसायी दुर्गा प्रसाईंको भक्तपुरस्थित घरमा शनिबार बिहान प्रहरी पुगेको परिवारले जनाएको छ। प्रहरीले घरको गेटमा बसेर निगरानी गरेको तर पक्राउको प्रयास नगरेको दुर्गा प्रसाईंका छोरा निराजन प्रसाईंले बताएका छन्।

निराजनका अनुसार बिहान करिब १ बजे तीनवटा गाडीमा आएका प्रहरीहरू घरको गेटमा बसेर निगरानी गरिरहेका थिए। त्यसबेला दुर्गा प्रसाईं घरमै रहेको उनले बताए।

‘प्रहरीहरू गेटमा बसेर बुवालाई निगरानी गरिरहेका थिए, तर पक्राउ गर्ने प्रयास गरेनन्। किन आएको भनेर सोध्दा पनि स्पष्ट जवाफ दिएनन्,’ निराजनले भने।

उनका अनुसार गेटमा बसेका केही प्रहरी फर्किए पनि घरबाट केही दूरीमा प्रहरी अझै तैनाथ थिए। उनले प्रहरीको गतिविधिले परिवारलाई अनावश्यक रूपमा आतंकित बनाउने प्रयास भएको आरोप लगाए।

प्रहरीको प्रतिक्रिया

घटनाबारे काठमाडौँ उपत्यका अपराध अनुसन्धान कार्यालयका एसएसपी सन्तोष खड्का र जिल्ला प्रहरी कार्यालय भक्तपुरका प्रवक्ता डीएसपी दीपक कार्कीलाई सम्पर्क गर्दा उनीहरूले आफूहरूलाई यसबारे जानकारी नभएको बताएका छन्।

एसएसपी खड्काले आफ्नो कार्यालयबाट प्रहरी टोली नपठाइएको दाबी गरे। भक्तपुर प्रहरीका प्रवक्ता डीएसपी कार्कीले भने नियमित गस्ती वा पेट्रोलिङका लागि प्रहरी परिचालन भएको हुन सक्ने तर त्यसबारे आफूलाई जानकारी नभएको बताए।

परिवारले भने प्रहरीले लामो समयसम्म घरनजिकै बसेर निगरानी गरेको दाबी गर्दै घटनाको स्पष्ट कारण सार्वजनिक गर्न माग गरेको छ।

Originally published on abcnews.com.np.