काठमाडौं । नेपाली कांग्रेस संस्थापनइतर समूहको भेलाबाट साउन २१ गते पाँच वटा प्रतिवेदन पारित गरिएको छ । काठमाडौंको सुकेधारामा साउन २९ गतेदेखि जारी भेलाले सो प्रतिवेदनहरू पारित गरेको हो ।

भेलाको उद्घाटन पूर्वसभापति शेरबहादुर देउवाले गरेका थिए । साउन ३० गते बन्दसत्र सुरु गर्दै विभिन्न प्रतिवेदन पेस गरिएको थियो ।

भेलामा नेता विमलेन्द्र निधिले राजनीतिक प्रस्ताव प्रस्तुत गरे, जबकि पूर्वकोषाध्यक्ष उमाकान्त चौधरीले सांगठनिक प्रस्ताव पेस गरेका थिए । त्यसैगरी, नेता एनपी साउदले समसामयिक नीति र विषयसम्बन्धी प्रस्ताव, डा. प्रकाशशरण महतले नेपालको आर्थिक नीतिसम्बन्धी प्रस्ताव र रमेश लेखकले कानुन तथा विधानसम्बन्धी प्रस्ताव प्रस्तुत गरे । प्रस्तुत गरिएका यी प्रस्तावहरूमा परिमार्जन गरिएको अवस्थामा पारित भएका हुन्।

प्रस्तावमाथि छलफल

साउन ३० गते प्रस्तुत प्रस्तावमाथि विभिन्न समूह बनाएर छलफल गरिएको थियो । समूहका टोली नेताहरूले प्रतिवेदनमा कस्ता विषयवस्तुको परिमार्जन गर्नुपर्ने हो भन्ने धारणा राखेका थिए ।

प्रतिनिधिबाट प्राप्त सुझाव र धारणाहरूबारे प्रतिवेदन प्रस्तुतकर्ताहरूले जवाफ दिएपछि ती प्रस्तावहरू परिमार्जनसहित पारित गरिएको नेताहरूले जानकारी दिएका छन् ।

Originally published on abcnews.com.np.