काठमाडौं । इन्डोनेसियाको फ्लोरेस टापुको तटीय क्षेत्रमा शनिबार गएको ७.७ म्याग्निच्युडको शक्तिशाली भूकम्पमा परी कम्तीमा ४७ जनाको मृत्यु भएको छ।

भूकम्पपछि दिनभर २३० भन्दा बढी पराकम्प गएका छन्। तीमध्ये सबैभन्दा शक्तिशाली पराकम्प ६.२ म्याग्निच्युडको रहेको बताइएको छ। लगातारका पराकम्पका कारण स्थानीयवासी त्रसित भएका छन् भने प्रभावित क्षेत्रमा उद्धार तथा राहत कार्य जारी छ।

अमेरिकी भूगर्भ सर्वेक्षण (यूएसजीएस) का अनुसार शनिबार पश्चिमी सुमात्रा टापुमा पनि ६.९ म्याग्निच्युडको अर्को भूकम्प गएको थियो। उक्त भूकम्प १७२.५ किलोमिटर गहिराइमा गएकाले त्यसबाट मानवीय वा भौतिक क्षतिको विवरण प्राप्त नभएको जनाइएको छ।

सुनामीको चेतावनी हटाइयो

शक्तिशाली भूकम्पपछि तटीय क्षेत्रमा सुनामीको चेतावनी जारी गरिएको थियो। नागेकेओ क्षेत्रमा समुद्रको पानीको तरंग तीन फिटसम्म माथि उठेपछि स्थानीयवासी सुरक्षित स्थानतर्फ लागेका थिए।

केही घण्टापछि सुनामीको चेतावनी हटाइए पनि अधिकारीहरूले प्रभावित क्षेत्रका बासिन्दालाई अझै सतर्क रहन र सुरक्षित स्थानमै बस्न आग्रह गरेका छन्।

सयौँ घरमा क्षति

इन्डोनेसियाको राष्ट्रिय विपद् व्यवस्थापन एजेन्सीका प्रमुख लेफ्टिनेन्ट जनरल सुहार्यान्टोका अनुसार भूकम्पबाट कम्तीमा १५७ वटा घर पूर्ण रूपमा नष्ट भएका छन् भने करिब २०० घरमा आंशिक क्षति पुगेको छ।

भूकम्पको केन्द्रविन्दु नजिक रहेको नागेकेओ क्षेत्रमा करिब दुई हजार स्थानीयवासी घर छाडेर अस्थायी आश्रयस्थलमा पुगेका छन्।

प्रभावित क्षेत्रमा राहत सामग्री पठाउनुका साथै उद्धार टोली परिचालन गरिएको छ। सरकारले प्रभावित परिवारलाई आवश्यक सहयोग उपलब्ध गराउन सम्बन्धित निकायलाई निर्देशन दिएको जनाएको छ।

Originally published on abcnews.com.np.