काठमाडौं । लामो समयदेखि एलपीजी ग्यासको अभाव झेल्दै आएका काठमाडौं उपत्यकाका उपभोक्ताले सरकारी पहलमा विभिन्न स्थानबाट ग्यास पाएपछि राहत महसुस गरेका छन्।

काठमाडौँ महानगरपालिका–३२ जडीबुटीकी तारा तामाङले घरनजिकैका ग्यास बिक्रेताकहाँ पटकपटक नाम टिपाउँदा पनि सिलिन्डर पाउन नसकेपछि बबरमहलस्थित पुरानो जिल्ला प्रशासन कार्यालय परिसरमा आएर ग्यास लिनुभयो। उहाँले एक थान सिलिन्डर पाएपछि केही राहत भएको बताउनुभयो।

“ग्यासका लागि धेरै दुःख गर्नुपर्‍यो। जडीबुटी आसपासका ग्यास बिक्रेताले नाम टिप्नसमेत मान्दैनथे,” उहाँले भन्नुभयो, “कम्तीमा यहाँ एक थान सिलिन्डर पाउँदा ठूलो राहत भएको छ।”

अनामनगरका रोजन मल्लले पनि केही समय लाइन बसेपछि ग्यास पाएपछि खुसी व्यक्त गर्नुभयो। सरकारले एकै ठाउँमा विभिन्न कम्पनीका ग्यास बिक्रीको व्यवस्था मिलाउँदा उपभोक्तालाई सहज भएको उहाँको भनाइ छ।

रातोपुलबाट बबरमहल ग्यास लिन आएकी विनिता त्रिपाठीले एक सातादेखि ग्यासको अभाव झेल्नुपरेको बताउनुभयो। एकै ठाउँमा विभिन्न कम्पनीका सिलिन्डर उपलब्ध भएपछि सहज भएको उहाँले बताउनुभयो।

पाँच स्थानबाट ग्यास वितरण

नेपाल आयल निगम र जिल्ला प्रशासन कार्यालय काठमाडौंको समन्वयमा आज उपत्यकाका पाँच स्थानबाट विभिन्न ब्रान्डका एलपीजी ग्यास बिक्री–वितरण गरिएको छ।

बबरमहलस्थित पुरानो जिल्ला प्रशासन कार्यालय परिसरबाट नेपाल, एचपी, एभरेस्ट, सुगम, श्रीराम, सगर, हिमाल, एसटीसी, लोकप्रिय र सूर्यलगायतका ग्यास बिक्री भइरहेको छ।

निगमका उपप्रबन्धक रविलाल घिमिरेका अनुसार बिहान १० बजेदेखि विभिन्न कम्पनीका ग्यास वितरण गरिएको हो। ग्यास लिन सर्वसाधारणको भीड लागेपछि सुरक्षाकर्मीसँग समन्वय गरेर वितरण व्यवस्थापन गरिएको उहाँले बताउनुभयो।

नेपाल आयल निगमका प्रबन्ध निर्देशक नागेन्द्र साहका अनुसार टेकु, चाबहिल, कीर्तिपुर, बसुन्धरा र बबरमहलबाट ग्यास वितरण गरिएको छ। तोकिएका बिक्री केन्द्रमा आउने उपभोक्तालाई सकेसम्म रित्तो हात नफर्काउने गरी ग्यास उद्योगीसँग समन्वय गरिएको उहाँले बताउनुभयो।

टेकुस्थित निगम परिसरबाट नेपाल, एचपी, एभरेस्ट, सुगम, श्रीराम, सगर, सिद्धार्थ र हिमाल ब्रान्डका ग्यास वितरण गरिएको छ। चाबहिलस्थित यातायात कार्यालय परिसरबाट नेपाल र एचपी तथा कीर्तिपुरको राधास्वामी परिसरबाट नेपाल, एचपी, एभरेस्ट, सुगम, श्रीमाया, श्रीकृष्ण, साइबाबा र ओम ब्रान्डका ग्यास बिक्री गरिएको निगमले जनाएको छ।

त्यस्तै, बसुन्धरास्थित राधास्वामी परिसरबाट नेपाल, एचपी, एभरेस्ट, सुगम, भानु र ओम ब्रान्डका ग्यास वितरण गरिएको छ।

Originally published on abcnews.com.np.