काठमाडौं । अमेरिकी राष्ट्रपति डोनाल्ड ट्रम्पले प्रस्ताव गरेको गाजा शान्ति योजना अस्वीकार गरेको भन्दै संयुक्त अरब इमिरेट्स (यूएई)सहित आठ देशले इजरायलको आलोचना गरेका छन्।

यूएई, कतार, जोर्डन, इन्डोनेसिया, पाकिस्तान, टर्की, साउदी अरब र इजिप्टका विदेशमन्त्रीहरूले संयुक्त वक्तव्य जारी गर्दै इजरायलले प्रस्तावित १५ बुँदे शान्ति योजनालाई अस्वीकार गर्नु युद्ध अन्त्य गर्ने प्रयासमा अवरोध भएको बताएका हुन्।

इजरायली प्रधानमन्त्री बेन्जामिन नेतान्याहुले हमासको निःशस्त्रीकरण नभएसम्म इजरायली सेना गाजाबाट फिर्ता नहुने अडान राख्दै ट्रम्पको प्रस्ताव अस्वीकार गरेका थिए।

ट्रम्पको ‘बोर्ड अफ पिस’ले गाजामा हमास तथा अन्य सशस्त्र समूहको पूर्ण निःशस्त्रीकरणका लागि सहमति जुटेको दाबी गरेपछि योजना कार्यान्वयनका लागि वार्ता भइरहेको छ। ट्रम्पका दूत तथा उनका ज्वाइँ ज्यारेड कुश्नर र गाजाका लागि बोर्ड अफ पिसका दूत निकोलाय म्लादेनोभ अहिले इजिप्टमा वार्तामा छन्।

योजनाअनुसार हमासले हतियार बुझाएपछि इजरायली सेना गाजाबाट क्रमशः फिर्ता हुने र त्यसपछि नयाँ प्यालेस्टिनी प्रहरी बल तथा अन्तर्राष्ट्रिय ‘स्थिरीकरण बल’ परिचालन गर्ने प्रस्ताव गरिएको छ।

आठ देशका विदेशमन्त्रीले इजरायलको अस्वीकारले गाजामा युद्ध अन्त्य र दिगो शान्ति स्थापनाका लागि ट्रम्पको प्रयास कमजोर पार्न सक्ने बताएका छन्। उनीहरूले अमेरिकालाई शान्ति योजनाको अखण्डता जोगाउँदै त्यसको कार्यान्वयनमा अवरोध हुन नदिन तत्काल ठोस कदम चाल्न आग्रह गरेका छन्।

यसैबीच, विभिन्न समाचार एजेन्सीले अज्ञात स्रोतलाई उद्धृत गर्दै कुश्नरले आइतबार हमासका वरिष्ठ नेता खलिल अल–हैयासँग भेटवार्ता गरेको जनाएका छन्। कुश्नर र म्लादेनोभले इजिप्टमा इजिप्ट, कतार र टर्कीका मध्यस्थकर्तासँग प्रस्तावित सम्झौता कार्यान्वयनबारे छलफल गरेका थिए।

कुश्नरले सोमबार इजरायली प्रधानमन्त्री नेतान्याहुसँग भेटवार्ता गर्ने कार्यक्रम छ।

हमासले यसअघि ‘निःशस्त्रीकरण’ शब्द स्वीकार नगरे पनि बोर्ड अफ पिसको निगरानीमा गाजाको शासन सञ्चालन गर्ने नयाँ प्यालेस्टिनी निकायलाई आफ्ना हतियार हस्तान्तरण गर्न तयार रहेको जनाएको थियो। हमासले मध्यस्थकर्ता तथा बोर्ड अफ पिसलाई शान्ति मार्गचित्र स्वीकार गर्न इजरायलमाथि दबाब दिन आग्रह गरेको छ।

Originally published on abcnews.com.np.