काठमाडौं । युक्रेन युद्धको विरोध गर्दै आएका रुसी विपक्षी नेता लेभ श्लोसबर्गलाई मस्कोस्थित एक अदालतले ११ वर्ष एक महिनाको जेल सजाय सुनाएको छ।

विपक्षी याब्लोको पार्टीका वरिष्ठ नेता श्लोसबर्गले सन् २०२२ फेब्रुअरीमा रुसले युक्रेनमाथि आक्रमण गरेयता युद्धको सार्वजनिक रूपमा विरोध गर्दै आएका थिए। उनको पछिल्लो दुई वर्षमा दायर गरिएको यो दोस्रो मुद्दा हो।

रुसमा आगामी महिना संसदीय निर्वाचन हुन लागेको बेला विपक्षी नेता तथा दलमाथि भइरहेको कारबाहीबीच श्लोसबर्गलाई सजाय सुनाइएको हो। क्रेमलिनले युक्रेन युद्धको आलोचना गर्ने नेता, कार्यकर्ता तथा अभियन्तामाथि निरन्तर कानुनी कारबाही गर्दै आएको छ।

याब्लोको रुसको युद्धविरोधी धारणा खुलेर राख्ने आधिकारिक राजनीतिक दलमध्ये प्रमुख हो। पार्टीमाथि पनि निर्वाचनमा सहभागी हुन प्रतिबन्ध लगाइएको छ।

रुसको सर्वोच्च अदालतले सोमबार याब्लोकोलाई निर्वाचन प्रक्रियाबाट प्रतिबन्ध लगाउने पुरानो फैसला कायम राखेको हो। पार्टीले उक्त फैसलाविरुद्ध गरेको अपिल सर्वोच्च अदालतले खारेज गरिदिएको छ।

रुसमा सेप्टेम्बर १८ देखि २० सम्म संसदीय निर्वाचन हुँदैछ। निर्वाचनअघि याब्लोको पार्टीलाई चुनावी प्रक्रियाबाट बाहिर राखिनु र उसका वरिष्ठ नेतालाई लामो जेल सजाय सुनाइनुलाई विपक्षीमाथिको दबाबका रूपमा हेरिएको छ।

Originally published on abcnews.com.np.