काठमाडौँ । उद्योग, वाणिज्य तथा आपूर्ति मन्त्रालयले काठमाडौँ उपत्यकासहित देशका विभिन्न भागमा खाना पकाउने एलपी ग्यासको बिक्री वितरण सहज हुँदै गएको दाबी गरेको छ।

उद्योगले तोकेका डिलर तथा डिपोबाट ग्यास बिक्री वितरण सुरु भएपछि बजारमा देखिएको अभाव क्रमशः हट्दै गएको मन्त्रालयले जनाएको छ। नेपाल आयल निगमको विवरणअनुसार देशभर उल्लेख्य मात्रामा एलपी ग्यास बिक्री वितरण सुरु भइसकेको छ।

डिलर तथा डिपोबाट नियमित बिक्री सुरु भएसँगै काठमाडौँ उपत्यकामा मात्रै ५२ हजार ५७६ सिलिन्डर ग्यास बिक्री वितरण भएको मन्त्रालयले जनाएको छ। उपत्यकाबाहेक अन्य जिल्लामा ७५ हजार १५८ सिलिन्डर ग्यास बिक्री वितरण गरिएको छ।

मन्त्रालयका अनुसार काठमाडौँ उपत्यकामा विभिन्न २१ वटा ग्यास उद्योगले डिलर तथा डिपोमा सिलिन्डर पठाएका छन्।

देशभरका ५८ वटा ग्यास उद्योगले कुल १ लाख २७ हजार ७३४ सिलिन्डर डिलरहरूमा पुर्‍याएको मन्त्रालयले जनाएको छ। ग्यासको नियमित आपूर्ति र बिक्री वितरण सुरु भएसँगै उपभोक्ताले भोग्दै आएको अभाव क्रमशः कम हुँदै जाने मन्त्रालयको अपेक्षा छ।

Originally published on abcnews.com.np.