काठमाडौँ । अभिनेता इमरान हाश्मीको मुख्य भूमिका रहेको भारतीय फिल्म ‘आवारापन–२’ ले बक्सअफिसमा आक्रामक कमाइ गरिरहेको छ।

गत शुक्रबार प्रदर्शनमा आएको फिल्मले चार दिनमै विश्वभर १३० करोड भारतीय रुपैयाँको कलेक्सन गरेको जनाइएको छ। भारतमा मात्रै फिल्मले ९१ करोड भारु नेट कलेक्सन गरेको छ भने ग्रस कमाइ १०९ करोड भारु पुगेको छ।

फिल्मले पहिलो दिन भारतमा २२ करोड भारुको ओपनिङ गरेको थियो। पहिलो दिनको कमाइसँगै यसले अघिल्लो फिल्मको लाइफटाइम कलेक्सनसमेत पार गरेको थियो। साथै ‘आवारापन–२’ हाश्मीको करिअरकै सबैभन्दा ठूलो ओपनिङ गर्ने फिल्म बनेको छ।

यसअघि सन् २०१७ मा रिलिज भएको हाश्मी अभिनीत ‘बादशाहों’ ले पहिलो दिन १२.६० करोड भारु कमाएको थियो।

‘आवारापन–२’ ले दोस्रो दिन ३३ करोड ७५ लाख भारु कमाएको थियो। तेस्रो दिन फिल्मले २६ करोड भारु कलेक्सन गरेको जनाइएको छ।

फिल्ममा हाश्मीले शिवम पण्डितको भूमिकालाई निरन्तरता दिएका छन्। उनीसँगै दिशा पटानी, पुरन गब्बी, अनिरुद्ध रावल, शबाना आजमी, सुविन्दर विक्की, विजयन्त कोहली र अतुल कुमारलगायत कलाकारको अभिनय छ।

नितिन कक्कड निर्देशित फिल्मलाई विशेष फिल्म्सको ब्यानरमा विशेष भट्ट र मुकेश भट्टले निर्माण गरेका हुन्।

Originally published on abcnews.com.np.