काठमाडौं । अमेरिकी टेलिभिजन सिरिज ‘हिरोज’ र ‘न्यासभिल’बाट चर्चित अभिनेत्री हेडन प्यानेटियरको ३६ वर्षको उमेरमा निधन भएको छ।

उनका पिता स्किप प्यानेटियरले विज्ञप्तिमार्फत हेडनको निधन पुष्टि गरेका हुन्। बीबीसीसहित सञ्चारमाध्यमलाई दिएको बयानमा उनले परिवार गहिरो दुःखमा रहेको बताउँदै हेडन असाधारण प्रतिभाकी अभिनेत्री रहेको उल्लेख गरेका छन्।

हेडनको निधनको कारण भने अहिलेसम्म सार्वजनिक गरिएको छैन। उनको निधनको खबरसँगै हलिउड तथा विश्वभरका उनका प्रशंसकले सामाजिक सञ्जालमार्फत दुःख व्यक्त गरिरहेका छन्।

टेलिभिजन सिरिज ‘हिरोज’मा अलौकिक शक्ति भएकी चियरलिडरको भूमिका निर्वाह गरेपछि हेडनले अन्तर्राष्ट्रिय ख्याति कमाएकी थिइन्। उनले ‘रिमेम्बर द टाइटन्स’ र ‘रेजिङ हेलेन’ लगायतका चलचित्रमा समेत अभिनय गरेकी थिइन्।

उनका पिता स्किपले परिवारको गोपनीयताको सम्मान गर्न आग्रह गरेका छन्। उनले हेडनको निधन परिवारका लागि ‘अकल्पनीय क्षति’ भएको भन्दै यसबाट सम्हालिन परिवारलाई समय आवश्यक रहेको बताएका छन्।

Originally published on abcnews.com.np.