काठमाडौं । आगामी असोज २ गतेदेखि देशव्यापी प्रदर्शनमा आउन लागेको नेपाली कथानक चलचित्र **‘कार्की साइँला’**को टिजर सार्वजनिक गरिएको छ।

निर्माण पक्षले नागपञ्चमीको अवसर पारेर सोमबार भदौ १ गते मुभिज डिजिटेनमेन्ट युट्युब च्यानलमार्फत चलचित्रको टिजर सार्वजनिक गरेको हो।

टिजरमा चलचित्रका मुख्य पात्र कार्की साइँलाको जीवन संघर्ष, सामाजिक हेपाइ र गाउँले परिवेशलाई रोचक ढंगले प्रस्तुत गरिएको छ। जितु नेपालले कार्की साइँलाको भूमिका निर्वाह गरेका छन्।

सात दिनभित्र विवाह गर्ने अठोट

भारी बोकेर जीविकोपार्जन गर्दै आएका कार्की साइँलालाई अविवाहित रहेको भन्दै साथीभाइले जिस्क्याएपछि उनको जीवनमा नयाँ मोड आउँछ।

साथीहरूको जिस्क्याइपछि उनले सात दिनभित्रै विवाह गरेर देखाउने अठोट लिन्छन्। यही अठोट र त्यसपछि उत्पन्न हुने घटनाक्रम चलचित्रको मुख्य कथावस्तुका रूपमा टिजरमा देखाइएको छ।

टिजरमा जितु नेपालसँगै प्रियाना आचार्य, सुशील पोखरेल, वीरेन्द्रसिंह कुशवाहा, मान्शी शर्मालगायत कलाकारलाई देख्न सकिन्छ।

राजेन्द्र बस्नेतको निर्देशन

राजेन्द्र बस्नेतको निर्देशनमा बनेको चलचित्र ‘कार्की साइँला’को कथा डम्बर राईले लेखेका हुन्।

चलचित्रको पटकथा तथा संवाद शंकर धिताल र सबिन अधिकारीले तयार पारेका छन्। बालकुमार राई र निर्भिक बञ्जाराको लगानी रहेको चलचित्रका कार्यकारी निर्माता अनन्त राई हुन्।

ग्रामीण परिवेश, सामाजिक सम्बन्ध र हास्यरसलाई कथाको आधार बनाइएको चलचित्रले गाउँघरको सामाजिक व्यवहार र एउटा सामान्य पात्रको जीवन संघर्षलाई पर्दामा प्रस्तुत गर्ने निर्माण पक्षले जनाएको छ।

‘लग्यौ परान’लाई दर्शकको राम्रो प्रतिक्रिया

चलचित्रमा दिप्सन लिम्बू र संकेत अगस्थीको संगीत रहेको छ।

यसअघि सार्वजनिक गरिएको चलचित्रको गीत **‘लग्यौ परान’**ले दर्शकबाट सकारात्मक प्रतिक्रिया पाइरहेको निर्माण पक्षले जनाएको छ।

‘कार्की साइँला’ आगामी असोज २ गतेदेखि देशभरका सिनेमा हलमा प्रदर्शनमा आउने तयारीमा छ। टिजर सार्वजनिक भएसँगै चलचित्रप्रति दर्शकको चासोसमेत बढ्ने अपेक्षा निर्माण पक्षले गरेको छ।

Originally published on abcnews.com.np.