काठमाडौं । नेपाली कांग्रेसका सभापति गगन थापाले पार्टीको १५औँ महाधिवेशन प्रक्रिया मंगलबारदेखि औपचारिक रूपमा सुरु भएको बताएका छन्।

सानेपामा विभिन्न जिल्लामा खटिने निर्वाचन अधिकृतहरूका लागि आयोजित प्रशिक्षण कार्यक्रममा बोल्दै सभापति थापाले आगामी असोज १६ देखि १९ गतेसम्म काठमाडौंमा केन्द्रीय महाधिवेशन हुने जानकारी दिए।

उनले पार्टी संविधान, विधान र अदालतको फैसलाबाट समेत निर्धारित समयसीमामा बाँधिएको भन्दै अब समयको सुविधा नरहेको बताए।

‘हामीसँग अब समयको सुविधा छैन। हामी संविधान र पार्टी विधानमा बाँधिएका छौँ। अदालतको फैसलामा पनि असोज १६ गतेबाट महाधिवेशन हुने भन्ने आधार बनाइएको छ,’ उनले भने।

डिजिटल सदस्यताले सहज हुने दाबी

सभापति थापाले यसपटक कांग्रेसको क्रियाशील सदस्यता डिजिटल भएकाले अघिल्ला महाधिवेशनको तुलनामा प्रक्रिया सहज हुने बताए।

उनले अधिवेशनका क्रममा कुनै प्रश्न नउठ्ने गरी निष्पक्ष र पारदर्शी रूपमा निर्वाचन सम्पन्न गर्नुपर्नेमा जोड दिए।

‘आजबाट हाम्रो अधिवेशन प्रक्रिया औपचारिकरूपमा प्रारम्भ भयो। निर्वाचन समितिले जुन कार्यतालिका बनाएको छ, त्यही कार्यतालिका हामी सबैले फलो गर्ने हो,’ थापाले भने।

उनका अनुसार असोज १६ अघि पार्टीका विभिन्न तहका अधिवेशन कसरी र कहिले गर्ने भन्ने विषयमा निर्वाचन समितिले कार्यतालिका बनाएर काम गर्नेछ।

सदस्यता टुंगियो, निर्वाचन समितिलाई हस्तान्तरण

सभापति थापाले महामन्त्री प्रदीप पौडेल नेतृत्वको समितिले क्रियाशील सदस्यताको काम टुंग्याएर निर्वाचन समितिलाई हस्तान्तरण गरिसकेको जानकारी दिए।

महाधिवेशनलाई निष्पक्ष र पारदर्शी बनाउन आवश्यक समितिहरू गठन तथा व्यवस्थापनका विषयमा खुला छलफल गर्न आफू तयार रहेको उनले बताए।

संस्थापनइतर पक्षसँग संवाद जारी

सभापति थापाले पार्टीको संस्थापनइतर पक्षसँग आफूले निरन्तर संवाद गरिरहेको पनि बताए।

राजनीतिक विषयमा छलफल चलिरहे पनि अब महाधिवेशनको कार्यतालिका प्रभावित हुने गरी समय खर्च गर्न नहुने उनको भनाइ छ।

‘राजनीतिक कुरा छलफल भइरहन्छ, तर हामीसँग अब समय छैन, महाधिवेशन प्रक्रिया सुरु भयो,’ थापाले भने।

Originally published on abcnews.com.np.