सुर्खेत । कर्णाली प्रदेशसभाको बैठक दोस्रोपटक स्थगित भएको छ। साउन २५ गते बस्ने भनिएको बैठक विशेष कारण देखाउँदै मंगलबार (भदौ २) का लागि सारिएको थियो। तर मंगलबार पनि बैठक बस्न नसकेपछि बुधबार (भदौ ३) दिउँसो ३ बजे बस्ने गरी नयाँ मिति तोकिएको छ।

प्रदेशसभा सचिवालयका सूचना अधिकारी राजेन्द्र पौडेलका अनुसार मंगलबारका लागि निर्धारित बैठक बस्न नसक्ने भएपछि सभामुखले प्रदेशसभा नियमावली, २०८१ को नियम ६ को उपनियम (२) र (३) बमोजिम बैठकको मिति र समय परिवर्तन गरेकी हुन्।

सचिवालयले मंगलबार सूचना जारी गर्दै बैठकको मिति र समय परिवर्तन गरिएको जानकारी दिएको छ।

मुख्यमन्त्रीले विश्वासको मत लिने

यसैबीच, मुख्यमन्त्री मंगलबहादुर शाहीले बुधबार प्रदेशसभाबाट विश्वासको मत लिने तयारी गरेका छन्। उनले विश्वासको मत लिने प्रयोजनका लागि सोमबार प्रदेशसभा सचिवालयमा पत्र दर्ता गराइसकेका छन्।

सरकार विस्तार तथा मन्त्रालय बाँडफाँटको विषयमा सत्ता साझेदार दलहरूबीच असमझदारी देखिइरहेका बेला मुख्यमन्त्री शाहीले विश्वासको मत लिने प्रक्रिया अघि बढाएका हुन्।

अब भदौ ३ गते दिउँसो ३ बजे बस्ने प्रदेशसभा बैठकमा मुख्यमन्त्री शाहीले विश्वासको मत लिने सम्भावना रहेको छ।

Originally published on abcnews.com.np.