काठमाडौं, भदौ २ गते । नेपाल दूरसञ्चार कम्पनी लिमिटेड (नेपाल टेलिकम) ले आर्थिक वर्ष २०८२/८३ को चौथो त्रैमासमा ४ अर्ब २० करोड २४ लाख ५२ हजार रुपैयाँ नाफा कमाएको छ।

कम्पनीले सार्वजनिक गरेको अपरिष्कृत वित्तीय विवरणअनुसार गत वैशाखदेखि असार मसान्तसम्मको तीन महिनामा टेलिकमको नाफा अघिल्लो आर्थिक वर्षको सोही अवधिको तुलनामा उल्लेख्य बढेको हो। अघिल्लो आर्थिक वर्षको चौथो त्रैमासमा कम्पनीले १ अर्ब २२ करोड ४८ लाख ४ हजार रुपैयाँ नाफा कमाएको थियो।

तेस्रो त्रैमाससम्म ३ अर्ब १४ करोड ८० लाख १८ हजार रुपैयाँ नाफा कमाएको टेलिकमले चौथो त्रैमासमा मात्रै थप १ अर्ब ५ करोड ४४ लाख ३४ हजार रुपैयाँ नाफा बढाएको हो।

कम्पनीका प्रवक्ता कमल लामिछानेका अनुसार पछिल्लो समय फाइबर टु द होम (एफटीटीएच) र जीएसएम डाटाको प्रयोग बढेसँगै आम्दानीमा वृद्धि भएको हो। भ्वाइस सेवाको तुलनामा डाटाको प्रयोग बढ्नु, सञ्चालन खर्च घट्नु तथा विज्ञापन र प्रायोजनमा खर्च कटौती हुनु नाफा बढ्नुका प्रमुख कारण रहेको उनले बताए।

टेलिकमले गत आर्थिक वर्षमा विज्ञापन तथा प्रायोजन खर्च कटौती गरेर मात्रै करिब १० देखि १५ करोड रुपैयाँ बचत गरेको जनाएको छ।

खुद नाफा ४७.५८ प्रतिशतले बढ्यो

आर्थिक वर्ष २०८२/८३ को चौथो त्रैमाससम्म नेपाल टेलिकमको खुद नाफा ८ अर्ब ८६ करोड ४६ लाख रुपैयाँ पुगेको छ। यो अघिल्लो आर्थिक वर्षको सोही अवधिको तुलनामा २ अर्ब ८५ करोड ७९ लाख रुपैयाँ अर्थात् ४७.५८ प्रतिशत बढी हो।

अघिल्लो आर्थिक वर्षको चौथो त्रैमाससम्म कम्पनीको खुद नाफा ६ अर्ब ६७ लाख रुपैयाँ थियो।

यस्तै, करअघिको मुनाफा १३ अर्ब २६ करोड ४७ लाख रुपैयाँ पुगेको छ। अघिल्लो वर्ष यस्तो मुनाफा ९ अर्ब ८५ करोड २ लाख रुपैयाँ थियो। यस आधारमा करअघिको मुनाफा ३ अर्ब ४१ करोड ४५ लाख रुपैयाँ अर्थात् ३४.६६ प्रतिशतले बढेको हो।

कुल सञ्चालन आय ३४ अर्ब ९५ करोड

समीक्षा अवधिमा नेपाल टेलिकमको कुल सञ्चालन आय ३४ अर्ब ९५ करोड ४ लाख रुपैयाँ पुगेको छ। यो अघिल्लो आर्थिक वर्षको तुलनामा ३.१२ प्रतिशत बढी हो।

कम्पनीको कुल आय पनि बढेर ३९ अर्ब १९ करोड ९६ लाख रुपैयाँ पुगेको छ। अघिल्लो आर्थिक वर्षमा कुल आय ३८ अर्ब १८ करोड ८१ लाख रुपैयाँ थियो। यसअनुसार कुल आय १ अर्ब १ करोड १५ लाख रुपैयाँ अर्थात् २.६५ प्रतिशतले बढेको छ।

कम्पनीको ब्याज, कर, ह्रासकट्टी तथा अमोर्टाइजेसनअघिको आम्दानी (EBITDA) २० अर्ब ४८ करोड १ लाख रुपैयाँ पुगेको छ। अघिल्लो आर्थिक वर्षमा यस्तो आम्दानी १८ अर्ब ४९ करोड ६० लाख रुपैयाँ थियो। यसमा १०.७३ प्रतिशत वृद्धि भएको हो।

प्रतिशेयर आम्दानी वार्षिकीकरणका आधारमा ४९.२५ रुपैयाँ रहेको कम्पनीले जनाएको छ।

डाटा प्रयोग बढ्दा आम्दानीमा सुधार

टेलिकमका अनुसार ब्याजदर घटेका कारण ब्याज आम्दानीमा कमी आए पनि मुख्य दूरसञ्चार सेवाबाट हुने आम्दानी बढ्दा सञ्चालन आय र नाफामा सकारात्मक प्रभाव परेको छ।

विशेषगरी जीएसएम सेवाबाट हुने आम्दानी अघिल्लो आर्थिक वर्षको चौथो त्रैमासको तुलनामा २.२८ प्रतिशतले बढेको छ।

पछिल्लो समय कम्पनीले सेवा सुधारमा पनि जोड दिएको छ। डाटा प्याकेज सकिएपछि स्वतः ब्यालेन्स काटिने व्यवस्था हटाइएको, अनलाइन सेवाको विस्तार तथा ‘वान टाइम केवाईसी’ लागू गरिएको कम्पनीले जनाएको छ।

‘पे–एज–यू–गो’ प्रणाली लागू भएपछि ग्राहकले डाटा सकिएपछि शुल्क कट्ने वा नयाँ प्याकेज खरिद गर्ने विकल्प पाउने व्यवस्था गरिएको छ। ई–सिम वितरण, गुनासो व्यवस्थापन, हराएको सिम पुनःप्राप्ति र स्वामित्व हस्तान्तरणजस्ता सेवा पनि अनलाइनबाट उपलब्ध हुन थालेका छन्।

त्यस्तै, ४जी सेवाको गुणस्तर सुधारका लागि थप फ्रिक्वेन्सी उपलब्ध गराइएको तथा ग्राहकको सहजताका लागि टेलिकमका कार्यालयमा ‘एकल बिन्दु सेवा’ सहायता कक्ष स्थापना गरिएको कम्पनीले जनाएको छ।

Originally published on abcnews.com.np.