काठमाडौं । रुपाकोट रिसोर्ट लिमिटेडले सर्वसाधारणका लागि प्राथमिक सेयर (आईपीओ) निष्कासन गर्ने तयारी थालेको छ। आईपीओ निष्कासन तथा बिक्री प्रबन्धकका रूपमा एनआईसी एशिया क्यापिटल लिमिटेडलाई नियुक्त गरिएको छ।

रुपाकोट रिसोर्ट र एनआईसी एशिया क्यापिटलबीच आईपीओ निष्कासनका लागि आवश्यक परामर्श सेवा तथा अन्य सहयोग उपलब्ध गराउनेसम्बन्धी सम्झौता भएको हो।

कास्कीको रुपा गाउँपालिका–६, मैदानमा अवस्थित रुपाकोट रिसोर्टले आगामी दिनमा सर्वसाधारणका लागि सेयर निष्कासन गर्ने तयारी गरेको जनाएको छ। सोही प्रक्रियालाई अघि बढाउन एनआईसी एशिया क्यापिटललाई निष्कासन तथा बिक्री प्रबन्धकको जिम्मेवारी दिइएको हो।

पोखराको रुपाकोट क्षेत्रमा रहेको रिसोर्ट प्राकृतिक सौन्दर्य, शान्त वातावरण तथा हिमाली दृश्यावलोकनका लागि परिचित रहेको कम्पनीले जनाएको छ। रिसोर्टबाट रुपा र बेगनास तालको मनोरम दृश्यसमेत अवलोकन गर्न सकिन्छ।

रिसोर्टले पोखरा उपत्यकाको पर्यटन सम्भावनालाई ग्रामीण तथा प्राकृतिक पर्यटनसँग जोड्दै रुपाकोटलाई उच्चस्तरीय आतिथ्य, प्रकृति अवलोकन र विश्रामको गन्तव्यका रूपमा विकास गर्ने उद्देश्य राखेको जनाएको छ।

रिसोर्टमा आवास, भोजन, मनोरञ्जन, विश्राम तथा विभिन्न कार्यक्रम सञ्चालनका लागि आवश्यक पूर्वाधार रहेको बताइएको छ। पारिवारिक भ्रमण, आन्तरिक तथा बाह्य पर्यटक, कर्पोरेट कार्यक्रम, सम्मेलन, विवाह तथा विशेष समारोहका लागि समेत रिसोर्ट उपयुक्त रहेको कम्पनीको दाबी छ।

एनआईसी एशिया क्यापिटलले ‘आइडिया टू आईपीओ’ सेवामार्फत निजी कम्पनीलाई सार्वजनिक कम्पनीमा रूपान्तरण गरी सर्वसाधारणका लागि सेयर निष्कासन प्रक्रियामा आवश्यक परामर्श तथा सहजीकरण गर्दै आएको जनाएको छ।

Originally published on abcnews.com.np.