नुवाकोट । लगातारको वर्षाका कारण टोखा–छहरे सडकखण्डमा पहिरो, लेदो र गेग्रान खस्ने जोखिम बढेपछि नुवाकोट जिल्ला प्रशासन कार्यालयले रातिको समयमा सवारी आवागमन बन्द गरेको छ।

जिल्ला प्रशासनले भदौ १ गते रातिदेखि लागू हुने गरी हरेक दिन राति १० बजेदेखि बिहान ५ बजेसम्म अत्यावश्यकबाहेकका सवारीसाधन सञ्चालनमा रोक लगाएको हो। यो व्यवस्था अर्को सूचना जारी नभएसम्म कायम रहनेछ।

नुवाकोटका प्रमुख जिल्ला अधिकारी शम्भुप्रसाद रेग्मीका अनुसार नुवाकोट हुँदै धादिङ तथा चीनसँगको उत्तरी नाका रसुवागढीसम्म जोडिने प्रमुख सडकमा वर्षाका कारण जोखिम बढेको छ।

विशेषगरी शिवपुरी गाउँपालिका–८ स्थित घट्टेखोला आसपासको टोखा–छहरे सडकखण्डमा वर्षाका कारण लेदो, पहिरो तथा गेग्रान खस्ने सम्भावना बढेपछि यात्रुको सुरक्षालाई प्राथमिकता दिँदै रातिको समयमा आवागमनमा रोक लगाइएको हो।

आकस्मिक सवारीलाई भने छुट

प्रमुख जिल्ला अधिकारी रेग्मीका अनुसार जोखिमयुक्त क्षेत्रमा सुरक्षाकर्मी परिचालन गरिएको छ। एम्बुलेन्स तथा अन्य अत्यावश्यक र आकस्मिक सेवाका सवारीसाधनलाई भने आवश्यक समन्वय र सुरक्षासहित सञ्चालन गर्न दिइनेछ।

उनले वर्षाको समयमा सडकको अवस्था जुनसुकै बेला जोखिमपूर्ण बन्न सक्ने भएकाले सर्वसाधारणलाई विशेष सावधानी अपनाउन आग्रह गरेका छन्।

अत्यावश्यक कामबाहेक घरबाहिर ननिस्कन र रातिको समयमा यात्रा नगर्न सर्वसाधारण, यातायात व्यवसायी तथा सम्बन्धित सबैलाई प्रशासनले आग्रह गरेको छ।

सडकको अवस्था जोखिमपूर्ण

जिल्ला प्रहरी कार्यालय नुवाकोटले पनि वर्षा जारी रहेकाले सडक तथा मौसमको अवस्था अझै जोखिमपूर्ण रहेको जनाएको छ। प्रहरीले प्रशासनले जारी गरेको सवारी आवागमनसम्बन्धी निर्णय कार्यान्वयनमा सहयोग गर्न तथा यात्रा गर्दा आवश्यक सावधानी अपनाउन आग्रह गरेको छ।

प्रशासनका अनुसार सडकमा पहिरो तथा गेग्रान खस्ने क्रम बढेमा आवागमनसम्बन्धी निर्णय थप कडा बनाउन सकिनेछ।

विपद्सम्बन्धी जानकारी तथा आकस्मिक सहयोग आवश्यक परेमा जिल्ला प्रहरी कार्यालय नुवाकोटको १००, सशस्त्र प्रहरी बलको १११४ तथा जिल्ला आपत्कालीन कार्यसञ्चालन केन्द्रको १२३४ मा सम्पर्क गर्न सकिने स्थानीय प्रशासनले जनाएको छ।

Originally published on abcnews.com.np.