काठमाडौं । नेपाली कांग्रेसले पार्टीको महाधिवेशन निर्धारित समयमै सम्पन्न गर्ने प्रतिबद्धता दोहोर्‍याउँदै अदालतमा मुद्दा विचाराधीन रहे पनि महाधिवेशन प्रक्रिया नरोक्ने स्पष्ट पारेको छ।

सानेपामा बुधबार आयोजित पत्रकार सम्मेलनमा कांग्रेस प्रवक्ता देवराज चालिसेले पार्टीको महाधिवेशन प्रक्रिया सुरु भइसकेको जानकारी दिँदै आगामी असोज १६ देखि १८ गतेसम्म महाधिवेशन गर्ने तयारी भइरहेको बताए।

उनले पार्टीको महाधिवेशन मंसिरभित्र सम्पन्न गर्नु बाध्यकारी रहेको दाबी गर्दै अदालतमा विचाराधीन विषयप्रति पार्टीको पूर्ण सम्मान रहेको बताए। तर अदालती प्रक्रिया अनिश्चित समयसम्म लम्बिन सक्ने भएकाले त्यसलाई कारण बनाएर महाधिवेशन रोक्न नसकिने उनको भनाइ थियो।

‘पार्टी विघटन हुने अवस्था आउन दिँदैनौँ’

प्रवक्ता चालिसेले अदालतको सम्मान गर्दै पार्टी विधानको समेत रक्षा गर्नुपर्ने बताए।

उनले भने, “हामी अदालतको सम्मान गर्छौँ, पार्टी विधानको रक्षा गर्छौँ। पार्टी विघटन हुने अवस्थामा बनाउन चाहँदैनौँ।”

उनका अनुसार पार्टीको आन्तरिक मतभेद र असन्तुष्टिलाई औपचारिक संरचनाभित्रै छलफल गरेर समाधान गर्नुपर्छ। संवाद र सहकार्यबाट समस्या समाधान गर्नुपर्नेमा उनले जोड दिए।

चालिसेले वैशाख ४ गते अदालतले विशेष महाधिवेशनलाई वैधानिक मानेर आदेश दिइसकेको दाबीसमेत गरे। उनका अनुसार पार्टीका ४० प्रतिशत सदस्यले माग गरेपछि विशेष महाधिवेशन बोलाउने विषय बाध्यकारी हुने अदालतको आदेशमा उल्लेख छ।

निर्वाचन आयोगको निर्णयमाथि कांग्रेसको दाबी

कांग्रेस प्रवक्ताले निर्वाचन आयोगले सबै पक्षको कुरा सुनेर अन्तिम निर्णय गरेको पनि बताए।

उनका अनुसार महाधिवेशनसम्बन्धी विषयमा अदालती प्रक्रिया लम्बिँदै जाँदा पार्टीको सांगठनिक प्रक्रिया नै प्रभावित हुन सक्ने अवस्था आउन सक्छ। त्यसैले महाधिवेशन रोकिराख्नु पार्टीको हितमा नहुने कांग्रेसको निष्कर्ष छ।

“अदालती प्रक्रिया अनन्तकालसम्म लम्बिन सक्छ। त्यसैले महाधिवेशन बाध्यकारी भएकाले रोकिँदैन,” चालिसेले भने।

‘कांग्रेस एउटै छ, विवाद छैन’

प्रवक्ता चालिसेले कांग्रेसभित्र पार्टी विभाजन हुने गरी कुनै विवाद नरहेको दाबी गरे। उनले पार्टीभित्र देखिएको असहमतिलाई ‘विवाद नभई नेताहरूको असन्तुष्टि’ का रूपमा व्याख्या गरे।

उनले पार्टीलाई अनिर्णयको बन्दी बनाएर राख्ने अवस्था स्वीकार्य नहुने बताए।

उनका अनुसार नेताहरूबीच रहेका मतमतान्तरलाई पार्टीको वैधानिक संरचनाभित्र छलफल गरेर समाधान गर्न सकिन्छ। संवाद, सहकार्य र आन्तरिक लोकतान्त्रिक प्रक्रियामार्फत कांग्रेसका समस्याको समाधान खोजिनुपर्ने उनको भनाइ छ।

कांग्रेसले महाधिवेशनको प्रक्रिया अघि बढाउने निर्णयसँगै पार्टीको आन्तरिक विवाद, अदालतमा विचाराधीन मुद्दा र निर्वाचन आयोगको निर्णयबीच देखिएको तनावलाई समेत संस्थागत प्रक्रियामार्फत समाधान गर्ने सन्देश दिएको छ।

Originally published on abcnews.com.np.