काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेले पार्टीको संसदीय दलको बैठक बोलाएका छन् । बैठक आज बिहान ११ बजे सिंहदरबारस्थित संसदीय दलको कार्यालयमा बस्नेछ ।

बैठकमा पार्टीका मन्त्रीहरूलाई अनिवार्य उपस्थित हुन निर्देशन दिइएको छ । संसद्मा सांसदहरूको उपस्थिति र प्रस्तुति कमजोर हुँदै गएपछि सभापति लामिछानेले बैठक बोलाएको रास्वपाका एक सांसदले बताएका छन् ।

रास्वपाका एक पदाधिकारीसमेत रहेका सांसदका अनुसार बैठकमा संसद्मा पार्टीका सांसदहरूको प्रस्तुति र उपस्थितिका विषयमा आवश्यक निर्देशन दिइनेछ ।

सामान्यतः संसदीय दलको बैठक बोलाउने जिम्मेवारी संसदीय दलका नेता वालेन्द्र शाह (बालेन) को हो । तर, शाह प्रधानमन्त्री रहेकाले उनी हालसम्म एकपटक मात्रै संसदीय दलको बैठकमा सहभागी भएका छन् । आजको बैठकमा पनि प्रधानमन्त्री शाह सहभागी हुने सम्भावना नरहेको रास्वपा नेताहरूले बताएका छन् ।

यसैबीच सभामुख डोलप्रसाद अर्यालले प्रधानमन्त्री शाहलाई भदौ १० गते सांसदहरूले उठाएका प्रश्नको जवाफ दिन संसद्मा उपस्थित हुन बोलाएका छन् ।

प्रधानमन्त्री शाहको व्यस्तताबीच रास्वपा सभापति लामिछानेले संसदीय दलका गतिविधिमा आफ्नो सक्रियता बढाउँदै लगेका छन् ।

Originally published on abcnews.com.np.