काठमाडौं । नेपाली कम्युनिस्ट पार्टीका संयोजक पुष्पकमल दाहाल ‘प्रचण्ड’ले सङ्घीय लोकतान्त्रिक गणतन्त्रका लागि भएको आन्दोलनको मुख्य नेतृत्वकर्ता भएकाले आफ्नो पार्टीको काँधमा ठूलो जिम्मेवारी रहेको बताएका छन् ।

बागमती प्रदेश कमिटीको बैठकलाई सम्बोधन गर्दै प्रचण्डले पञ्चायती निरङ्कुशता हुँदै निरङ्कुश राजतन्त्रविरुद्धका आन्दोलनमा पार्टीले नेतृत्वदायी भूमिका निर्वाह गरेको स्मरण गरे ।

उनले प्राप्त पहिचान र अधिकारमाथि प्रतिक्रान्तिकारी तथा प्रतिगामी हमला भइरहेको दाबी गर्दै मजदुर, किसान र श्रमजीवी जनतामाथि राज्यकै तर्फबाट हमला भइरहेको बताए ।

अधिकारमाथिको हमला नरोकिए सडकबाटै प्रतिवाद गर्नुपर्ने अवस्था आउन सक्ने उनको भनाइ थियो । लाखौँ क्रान्तिकारी कार्यकर्ता र नेताहरूको जमात भएको पार्टी नेकपा नै रहेको दाबीसमेत उनले गरे ।

पुरानो पार्टी विघटन गरी नयाँ निर्माणको पहल

प्रचण्डले पुरानो पार्टी विघटन गरी नयाँ पार्टी निर्माणको पहल आफूहरूले नै गरेको बताए । यसलाई ऐतिहासिक काम भन्दै उनले त्यसलाई कहिल्यै बिर्सन नहुने बताए ।

गत भदौ २४ गतेको विध्वंसपछि विचार, राजनीति र संगठनमा मूलभूत समानता राख्ने शक्तिहरू सम्भव भएसम्म एकताबद्ध भएर अघि बढ्नुपर्ने निष्कर्षमा आफूहरू पुगेको उनले बताए ।

निर्वाचन सामान्य थिएन : प्रचण्ड

प्रचण्डले निर्वाचनको क्रममा पार्टी एकताको प्रक्रियामार्फत जनतामा नयाँ सन्देश दिने प्रयास गरिएको बताए ।

तर उक्त निर्वाचन सामान्य निर्वाचन नभएको उनको दाबी छ । भदौ २४ गतेको प्रतिक्रान्तिको निरन्तरताका रूपमा निर्वाचनलाई आफूहरूले नियोजित निर्वाचनका रूपमा देखेको प्रचण्डले बताए ।

Originally published on abcnews.com.np.