सुर्खेत — कर्णाली प्रदेशमा नेपाली कम्युनिस्ट पार्टी (नेकपा) र नेकपा (एमाले) बीच सरकार गठन तथा सञ्चालनका लागि मन्त्रालय बाँडफाँटसम्बन्धी सहमति भएको छ।

दुवै दलका संसदीय दलका नेताबीच बुधबार लिखित सहमति भएसँगै प्रदेश सरकारमा शक्ति बाँडफाँट औपचारिक रूपमा टुंगिएको हो। सहमतिपत्रमा नेकपाका संसदीय दलका नेता तथा मुख्यमन्त्री मंगलबहादुर शाही र एमाले संसदीय दलका नेता यामलाल कँडेलले हस्ताक्षर गरेका छन्।

सहमति अनुसार नेकपाले मुख्यमन्त्रीसहित चार मन्त्रालय पाउनेछ। उसले मुख्यमन्त्री तथा मन्त्रिपरिषद्को कार्यालयसँगै भौतिक पूर्वाधार विकास मन्त्रालय, भूमि व्यवस्था, कृषि तथा सहकारी मन्त्रालय र उद्योग, पर्यटन, वन तथा वातावरण मन्त्रालय सम्हाल्नेछ।

त्यस्तै, एमालेले तीन मन्त्रालय पाउने भएको छ। एमालेको भागमा आर्थिक मामिला तथा योजना मन्त्रालय, सामाजिक विकास मन्त्रालय तथा जलस्रोत तथा ऊर्जा विकास मन्त्रालय परेका छन्।

मन्त्रालय बाँडफाँटसँगै कर्णालीमा नेकपा र एमालेबीचको सत्ता सहकार्यको संरचना स्पष्ट भएको छ। दुवै दलले सहमतिअनुसार मन्त्रालय सम्हाल्दै प्रदेश सरकार सञ्चालनमा संयुक्त रूपमा भूमिका निर्वाह गर्नेछन्।

Originally published on abcnews.com.np.