काठमाडौँ — ९९औँ एकेडेमी अवार्ड्स (ओस्कार) को ‘इन्टरनेसनल फिचर फिल्म’ विधामा नेपालको प्रतिनिधित्व गर्ने चलचित्र छनोट प्रक्रिया सुरु भएको छ।

नेपाल इन्टरनेसनल फिचर फिल्म छनोट समितिले मापदण्ड पूरा गरेका नेपाली चलचित्रलाई भदौ २२ गतेसम्म आवेदन दिन आह्वान गरेको छ। समितिका अध्यक्ष लक्ष्मीनाथ शर्माले जारी गरेको सूचनामा तोकिएको समयभित्र काठमाडौँस्थित समितिको सचिवालयमा चलचित्र दर्ता गराउन आग्रह गरिएको छ।

ओस्कारको प्रतिस्पर्धामा सहभागी हुन चलचित्रले नेपाल सरकारको केन्द्रीय चलचित्र जाँच समितिबाट प्रमाणीकरण पाएको हुनुपर्नेछ। साथै, २०८२ असोज १५ देखि २०८३ असोज १४ गतेसम्म नेपालका व्यावसायिक सिनेमा घरमा प्रदर्शन भएको हुनुपर्नेछ।

चलचित्र लगातार कम्तीमा सात दिन व्यावसायिक रूपमा प्रदर्शन भएको हुनुपर्नेछ। अमेरिका र उसका भूभागबाहेक अन्य देशका व्यावसायिक सिनेमा घरमा टिकट बिक्रीसहित लगातार सात दिन प्रदर्शन भएका चलचित्रलाई पनि यो मापदण्डमा समेटिनेछ। उक्त सर्त पूरा नभए ओस्कारले मान्यता दिएका आधिकारिक अन्तर्राष्ट्रिय चलचित्र महोत्सवमा ‘क्वालिफाइङ अवार्ड’ जितेको चलचित्रले पनि प्रतिस्पर्धा गर्न पाउनेछ।

टेलिभिजन, भीओडी, डीभीडी, इन्टरनेट स्ट्रिमिङ वा एयरलाइन इन्टरटेनमेन्टमार्फत पहिलोपटक सार्वजनिक भएका चलचित्र भने छनोटका लागि योग्य हुने छैनन्।

छनोटका लागि निर्देशक, लेखक वा निर्मातामध्ये कम्तीमा एक जना नेपाली नागरिक हुनुपर्नेछ। चलचित्रमा नेपाली परिवेश र तत्त्व झल्किएको हुनुपर्ने तथा ५० प्रतिशतभन्दा बढी संवाद नेपाली भाषामा हुनुपर्ने प्रावधान छ। चलचित्रमा स्पष्ट बुझिने अंग्रेजी सबटाइटलसमेत अनिवार्य गरिएको छ।

छनोटमा परेको चलचित्रले ओस्कारका प्राविधिक मापदण्डसमेत पूरा गर्नुपर्नेछ। भिडियो ३५ वा ७० एमएम फिल्म अथवा न्यूनतम २०४८×१०८० पिक्सेल रिजोलुसनको २४ वा ४८ फ्रेमको डीसीपी फर्म्याटमा उपलब्ध हुनुपर्नेछ। अडियो ५.१ वा ७.१ च्यानलमा हुनुपर्नेछ।

इच्छुक निर्माताले अनलाइन आवेदन फारम भरी आवश्यक कागजात तथा सामग्रीसहित समितिको सचिवालयमा सम्पर्क गर्न सक्नेछन्। थप नियम तथा प्राविधिक मापदण्ड ओस्कारको आधिकारिक वेबसाइटमा उपलब्ध हुने समितिले जनाएको छ।

Originally published on abcnews.com.np.