उपभोक्ता र उद्योगलाई सहुलियत दरमा विद्युत् उपलब्ध गराउने विषयमा अध्ययन गरिरहेको समितिको बैठक बुधबार बस्दैछ । प्राधिकरणका सञ्चालक समिति सदस्य अंशुकिरण शाहीको संयोजकत्वमा गठित समितिको बैठकमा ऊर्जा मन्त्रालय, नेपाल उद्योग वाणिज्य महासंघका प्रतिनिधि, ऊर्जा विज्ञ, उपभोक्ता तथा वित्त क्षेत्रका विज्ञ सहभागी हुनेछन् ।

समितिले दिउँसो ४ बजे मन्त्रालयमा बस्ने बैठकमा विद्युत् महसुल घटाउने उपायबारे छलफल गर्ने जनाएको छ । संयोजक शाहीका अनुसार वर्षायाममा उत्पादन भएको विद्युत् खेर गइरहेको अवस्थालाई ध्यानमा राख्दै आन्तरिक खपत बढाउन महसुल पुनरवलोकन गर्न लागिएको हो ।

वर्षायाममा विद्युत् खपत कम हुँदा प्राधिकरणले ठूलो परिमाणमा विद्युत् खेर फाल्नुपर्ने अवस्था रहेको छ । यस्तो अवस्थामा ‘सिजनल ट्यारिफ’ लागू गरेर उपभोक्ता तथा उद्योगलाई वर्षायाममा सस्तो दरमा विद्युत् उपलब्ध गराई खपत बढाउने तयारी गरिएको छ ।

उद्योगलाई समेत सहुलियत दरमा विद्युत् उपलब्ध गराउने विषयमा छलफल भइरहेको शाहीले बताए । उद्योगले सस्तो दरमा विद्युत् पाएपछि उत्पादन लागत घट्ने र त्यसको लाभ उपभोक्तासम्म पुर्‍याउन सकिने विषयमा पनि समितिले अध्ययन गरिरहेको छ ।

शाहीका अनुसार वर्षायाममा सिजनल ट्यारिफमार्फत विद्युत्को मूल्य घटाउने विषयमा बुधबारको बैठकमा विस्तृत छलफल हुनेछ । उनले यस विषयमा चाँडै निर्णय गर्ने तयारी रहेको बताए ।

सरकारले विद्युत्मा कर बढाएको भन्दै आलोचना भइरहेका बेला ऊर्जा मन्त्रालयले भने महसुल घटाएर आन्तरिक विद्युत् खपत बढाउने विकल्पमा गृहकार्य अघि बढाएको हो ।