काठमाडौं । नेकपा एमालेका महासचिव शंकर पोखरेलले वर्तमान सरकारको कार्यशैलीको तुलना कलाकार जोडी सीताराम कट्टेल ‘धुर्मुस’ र कुञ्जना घिमिरे ‘सुन्तली’ले भरतपुरमा अन्तर्राष्ट्रिय क्रिकेट रंगशाला निर्माण सुरु गर्दाको अवस्थासँग गरेका छन्।

बिहीबार फेसबुकमार्फत धारणा सार्वजनिक गर्दै पोखरेलले राष्ट्रिय स्वतन्त्र पार्टी (रास्वपा) ले अहिलेकै शैलीमा सरकार सञ्चालन गरिरहे ‘रवि–बालेन समूह’ले पनि धुर्मुस–सुन्तलीकै नियति भोग्नुपर्ने चेतावनी दिएका हुन्।

पोखरेलले धुर्मुस–सुन्तलीले दानदातव्यको भरमा ठूलो परियोजना सुरु गर्नु अपरिपक्व कदम भएको टिप्पणी गरेका छन्। रकम अभाव र बढ्दो उधारोका कारण परियोजना संकटमा परेको र उनीहरू पलायन हुन बाध्य भएको उनको दाबी छ।

उनले अहिलेको नयाँ राजनीतिक नेतृत्वको कार्यशैली पनि त्यस्तै दिशातर्फ अघि बढिरहेको आरोप लगाएका छन्।

‘राजनीति लामो संघर्ष, समर्पण र राज्य सञ्चालनको कला तथा विज्ञान हो। केवल डिजिटल लोकप्रियता र एल्गोरिदमको भरमा सत्ता चलाउन खोज्दा मुलुकमा चौतर्फी अन्योल, आर्थिक शिथिलता र सामाजिक संकट गहिरिँदै गएको छ,’ पोखरेलले लेखेका छन्।

उनले स्पष्ट योजना र दूरदर्शिताबिना राज्यसत्ता सञ्चालन गरे नयाँ राजनीतिक नेतृत्वले समेत असमयमै पलायनको बाटो रोज्नुपर्ने अवस्था आउन सक्ने चेतावनी दिएका छन्।

‘समयमै चेत खुलोस्!’ भन्दै पोखरेलले वर्तमान सरकारलाई कार्यशैली सुधार गर्न संकेत गरेका छन्।

Originally published on abcnews.com.np.