रास्वपाको केन्द्रीय समिति बैठक आज, स्थानीय निर्वाचनको उम्मेदवार छनोट मुख्य एजेन्डा

पोखरा । सत्तारुढ राष्ट्रिय स्वतन्त्र पार्टी (रास्वपा) को केन्द्रीय समिति बैठक आज बस्दैछ। पार्टी सभापति रवि लामिछानेको निर्देशनअनुसार महामन्त्री विपीनकुमार आचार्यले शुक्रबार बिहान ११ बजे वनस्थलीस्थित केन्द्रीय कार्यालय ‘घन्टीघर’मा बैठक बोलाएका हुन्।

आगामी स्थानीय तह निर्वाचन र पार्टीको आन्तरिक संगठन सुदृढीकरणलाई केन्द्रमा राखेर बैठकका कार्यसूची तय गरिएको छ।

बैठकको मुख्य एजेन्डामा आगामी स्थानीय निर्वाचनका लागि ‘उम्मेदवार छनोट रूपरेखा–२०८३’ अनुमोदन गर्ने विषय रहेको छ। निर्वाचनमा उम्मेदवार छनोट गर्दा अपनाइने विधि तथा प्रक्रियालाई बैठकमार्फत अन्तिम रूप दिने तयारी रास्वपाको छ।

यस्तै, पार्टीले स्थापनाकालदेखि उठाउँदै आएको ‘राइट टु रिकल’ अर्थात् निर्वाचित जनप्रतिनिधिलाई फिर्ता बोलाउन सकिने अधिकारसम्बन्धी दस्तावेज निर्माण गर्ने विषय पनि बैठकको कार्यसूचीमा राखिएको छ। उक्त व्यवस्थालाई कार्यान्वयनमा लैजान आवश्यक कानुनी तथा राजनीतिक खाका तयार गर्ने पार्टीको योजना छ।

संगठनमा मनोनयन र जिम्मेवारी बाँडफाँट

बैठकमा पार्टीका रिक्त तथा थप गर्नुपर्ने विभिन्न संगठनात्मक पदमा मनोनयन गर्ने विषयमा पनि छलफल हुनेछ।

केन्द्रीय समिति सदस्य तथा पदाधिकारी, सचिवालय सदस्य र विभिन्न विभागीय प्रमुखको मनोनयन तथा जिम्मेवारी बाँडफाँट गर्ने एजेन्डा बैठकमा राखिएको छ। स्थानीय निर्वाचनका लागि केन्द्रीय उम्मेदवार छनोट समिति गठन तथा त्यसका सदस्य मनोनयन गर्ने विषय पनि कार्यसूचीमा छ।

देशव्यापी प्रशिक्षणदेखि डिजिटल पत्रिकासम्म

स्थानीय तह निर्वाचनमा उम्मेदवार छनोटको विधि र प्रक्रियाबारे कार्यकर्तालाई जानकारी गराउन केन्द्रीय सदस्य तथा सांसदहरूको नेतृत्वमा देशव्यापी प्रशिक्षण र अभिमुखीकरण कार्यक्रम सञ्चालन गर्ने प्रस्ताव पनि बैठकमा पेस हुने भएको छ।

यस्तै, पार्टीका आधिकारिक धारणा तथा गतिविधि सार्वजनिक गर्न ‘स्वतन्त्र’ नामक मासिक डिजिटल पत्रिका प्रकाशन गर्ने निर्णयसमेत बैठकबाट हुने बताइएको छ।

Originally published on abcnews.com.np.