काठमाडौँ । आयुर्वेद चिकित्सा परिषद्को रजिस्ट्रारमा डा. हरिशरण अर्याल नियुक्त भएका छन् ।

नवनियुक्त रजिस्ट्रार डा. अर्यालले शुक्रबार स्वास्थ्य तथा खाद्य स्वच्छता मन्त्री निशा मेहतासमक्ष पद तथा गोपनीयताको शपथ लिएका छन् ।

डा. अर्यालले त्रिभुवन विश्वविद्यालयअन्तर्गत आयुर्वेद क्याम्पसबाट बीएएमएस तथा कायचिकित्सा विषयमा एमडी गरेका छन् । एमडी अध्ययनका क्रममा उनले स्वर्णपदकसहित विशिष्ट श्रेणी हासिल गरेका थिए ।

उनी सन् २००९ देखि नेशनल नेचर केयर हस्पिटलमा मेडिकल डाइरेक्टरका रूपमा कार्यरत छन् । त्यसअघि उनले नरदेवीस्थित आयुर्वेद अस्पतालमा कन्सल्टेन्ट कायचिकित्सकका रूपमा काम गरेका थिए ।

डा. अर्याल नेपाल आयुर्वेद मेडिकल काउन्सिल तथा सिंहदरबार वैद्यखाना विकास समितिका पूर्वकार्यकारी सदस्यसमेत हुन् ।

आयुर्वेद क्षेत्रमा लामो अनुभव

कायचिकित्सा क्षेत्रमा विशेषज्ञता हासिल गरेका डा. अर्यालले आयुर्वेद चिकित्सा सेवाको उपचार तथा व्यवस्थापन क्षेत्रमा लामो समयदेखि काम गर्दै आएका छन् ।

नेशनल नेचर केयर हस्पिटलमा मेडिकल डाइरेक्टरका रूपमा कार्यरत रहँदा उनले अस्पताल व्यवस्थापनसँगै आयुर्वेद चिकित्सा सेवाको विकासमा समेत भूमिका निर्वाह गरेका छन् । नरदेवीस्थित आयुर्वेद अस्पतालमा कन्सल्टेन्ट कायचिकित्सकका रूपमा रहँदा विभिन्न रोगको उपचारमा समेत संलग्न थिए ।

Originally published on abcnews.com.np.