बुटवल । लुम्बिनी प्रदेशमा सवारी दुर्घटनाको प्रमुख कारण तीव्र गति रहेको पाइएको छ । नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय, बुटवलका अनुसार साउन महिनामा प्रदेशभर भएका ४१८ वटा सवारी दुर्घटनामध्ये २८७ वटा तीव्र गतिका कारण भएका हुन् ।

प्रहरीले सार्वजनिक गरेको साउन महिनाको ट्राफिक गतिविधि विवरणअनुसार दुर्घटनामा परी ३५ जनाको मृत्यु भएको छ भने ७११ जना घाइते भएका छन् । मृत्यु हुनेमा २८ पुरुष र सात महिला रहेका छन् ।

मापसे दोस्रो प्रमुख कारण

सवारी दुर्घटनाको दोस्रो प्रमुख कारण मादक पदार्थ सेवन गरी सवारी चलाउनु रहेको प्रहरीले जनाएको छ । साउनमा मापसेका कारण ७३ वटा दुर्घटना भएका छन् ।

त्यस्तै, चालकको असक्षमता तथा लापरबाहीका कारण ३९ वटा दुर्घटना भएका छन् । अन्य लापरबाहीका कारण ६, ब्रेक फेल भएर ६, छाडा चौपाया तथा जनावरका कारण ४, हतारमा बाटो काट्दा २ र अनावश्यक ओभरटेक गर्दा १ वटा दुर्घटना भएको प्रहरी तथ्यांकमा उल्लेख छ ।

प्रहरीका अनुसार दुर्घटनामा घाइते हुनेको संख्या ७११ रहेको छ । तीमध्ये पुरुषको संख्या बढी छ ।

सवारी दुर्घटनाको संख्या र त्यसबाट हुने मानवीय क्षति कम गर्न तीव्र गति नियन्त्रण, मापसे परीक्षण तथा ट्राफिक नियमको प्रभावकारी कार्यान्वयनमा जोड दिनुपर्ने देखिएको छ।

Originally published on abcnews.com.np.