सर्वोच्च अदालतको आदेशपछि खानलाई बिहीबार राति र शुक्रबार बिहानको बीचमा सुरक्षाको घेरामा अस्पताल लगिएको थियो। चिकित्सकहरूको टोलीमा नेत्ररोग विशेषज्ञ, मुटुरोग विशेषज्ञ र फिजिसियन सहभागी थिए। उनकी बहिनी अज्मा खान पनि स्वास्थ्य परीक्षणका सबै चरणमा उपस्थित रहेको मन्त्री तरारले बताएका छन्। परीक्षणपछि शुक्रबार बिहान करिब ५ बजे उनलाई अदियाला जेल फर्काइएको हो।

सर्वोच्च अदालतले मंगलबार खानलाई स्वास्थ्य परीक्षण तथा उपचारका लागि इस्लामावादको शिफा इन्टरनेसनल अस्पतालमा लैजान आदेश दिएको थियो। तर, शिफा अस्पतालबाहिर पाकिस्तान तेहरिक–ए–इन्साफ (पीटीआई)का समर्थकको भीड र सुरक्षास्थितिलाई कारण देखाउँदै सरकारले खानको परीक्षण पाकिस्तान इन्स्टिच्युट अफ मेडिकल साइन्सेस (पीआईएमएस)मा गराएको जनाएको छ। शिफा अस्पतालका चिकित्सकहरू पनि पीआईएमएसमा गरिएको परीक्षणमा सहभागी भएको सरकारको भनाइ छ।

खानको परिवार र पीटीआईले भने अदालतको आदेशअनुसार निजी अस्पतालमा लैजानुपर्नेमा सरकारी अस्पतालमा परीक्षण गराएर तत्काल जेल फर्काइनु आदेशको उल्लंघन भएको आरोप लगाएका छन्। पीटीआईले यस विषयमा कानुनी कदम चाल्ने संकेत गरेको छ।

७३ वर्षीय खान लामो समयदेखि स्वास्थ्य समस्याबारे गुनासो गर्दै आएका छन्। उनका वकिल तथा परिवारले विशेषगरी आँखाको दृष्टिसम्बन्धी समस्या रहेको र पर्याप्त विशेषज्ञ उपचार नपाएको दाबी गर्दै आएका थिए। सरकारले भने चिकित्सकीय परीक्षणबाट तत्काल गम्भीर स्वास्थ्य समस्या नदेखिएको जनाएको छ।

इमरान खान सन् २०१८ देखि २०२२ सम्म पाकिस्तानका प्रधानमन्त्री थिए। सन् २०२३ अगस्टदेखि उनी विभिन्न मुद्दामा जेलमा छन्। खान र उनको दल पीटीआईले आफूविरुद्धका मुद्दालाई राजनीतिक रूपमा प्रेरित भएको दाबी गर्दै आएका छन्।

यस घटनाले खानको स्वास्थ्य उपचार र उनलाई दिइएको सर्वोच्च अदालतको राहत कार्यान्वयनको विषयलाई लिएर पाकिस्तान सरकार र पीटीआईबीचको विवाद फेरि चर्काउने सम्भावना देखिएको छ।